Ben Madilynn
Patay ang usa ka barangay konsehal sa Brgy. Cogon, siyudad sa Bogo ang gipusil-patay samtang nagmaneho sa iyang motorsiklo sa Purok 6 sa maong barangay, alas 8:30 sa gabii, Sabado, Sept. 7, 2024.
Ang biktima mao si Antonio Harry Oporto Godinez, 57, minyo, ug taga Brgy. Cogon.
Sa pakisusi sa Superbalita Cebu pinaagi sa pasiunang imbestigasyon sa kapulisan ubos sa kamandoan sa ilang hepe nga si P/Lt. Col. Allan Rosario, nasuta nga ang biktima padulong mouli sa ilang balay dihang gipusil sa duha ka wa mailhing mamumuno gamit ang wala matino nga kalibre sa armas. Ang biktima nakaangkon og unom ka mga samad pinusilan sa nagkadaiyang bahin sa lawas.
Ang biktima gidali sa Emergency Rescue Team ug gidala sa Bogo City Provincial Hospital apan gideklarar nga dead on arrival. Atol ning pagsuwat, ang kapulisan nagpadayon pa sa hot pursuit samtang blangko pa sa motibo sa krimen hinungdan sa ilaTng padayong paglusad sa imbestigasyon. / DVG
