Liog sa asawa giabis sa bana

Nakurat ang usa ka anak nga nibisita sa balay sa iyang ginikanan sa Barangay Upper Calumpang, lungsod sa Oslob, probinsya sa Sugbo alas 5 sa hapon niadtong Sabado, Septiyenbre 7, 2024 dihang nakita ang iyang inahan nga samdan sa liog ug patay nga nahagba sa sala.

Ang biktima nga asawa nag-edad na og 72 ug ang suspek nga bana nag-edad og 73, mga mag-uuma, ug lumad sa naa­soy nga dapit.

Sa pakisusi sa Superbalita Cebu, ang hepe sa kapulisan sa Oslob nga si P/Maj. Jude Cabrero nga gipahibawo sila sa maong insidente sa usa ka anak nga lalaki nga nibisita sa balay sa iyang ginikanan.

Sumala sa anak, iyang gipangita ang amahan wala na kini sa ilang balay.

Matod ni Cabrero, sa ilang imbestigasyon nahibaw-an nga sa wala pa ang maong insidente, ang amahan nanghuwam og motorsiklo sa ilang silingan ug kuwarta nga P500.

Mao kini hinungdan nga ilang nasuspetsahan ang bana sa biktima nga maoy naghimo sa krimen.

Sa pagsubay sa kapulisan, ang motorsiklo na-recover sa lungsod sa Santander tungod sa pagtabang sa mga igsuon ug kabanay sa suspek.

Ang mga kabanay maoy nihatag og impormasyon sa kapulisan nga ang suspek nga bana nilarga sa Barangay Basak, siyudad sa Mandaue nga nitago sa ilang laing kaba­nay.

Sa Dominggo, Septiyembre 8, alas 11 sa gabii, gihimo ang operasyon sa kapulisan hinungdan nga nasikop ug gidala sa police station sa Oslob ug nag-atubang kini sa kasong parricide.

Samtang ang suspek nga nahinabi sa Superbalita Cebu sa prisohan sa Oslob Municipal Police Station nagkanayon nga alas 4 sa kaadlawon na human siya wala makatulog tungod sa giingong grabeng yawyaw sa iyang asawa.

Matod sa bana, lakip sa giingong gipangyawyaw sa asawa mao ang ilang kagahapon sama sa pagduda nga dunay siyay anak sa gawas.

Dugang niya nga sama sa nawala siya sa iyang kaugali­ngon ug nikuha og sanggot dayong tigbas ug giabis ang liog sa asawa hangtod namatay.

Diha na siya nakaamgo human sa hitabo ug nagkadayon nga nagplano nga motahan sa awtoridad.

Apan, dugang niya, niadto una siya sa iyang mga igsuon sa Mandaue aron pagbisita sa dili pa siya mabilanggo kay dili na unya niya igkita sila. /