Ben Madilynn
Usa ka lalaki nga gialarma nga armado, ang nadakpan ug nakuhaan pa og drugas gawas sa armas atol sa pagrekisa sa bulsa sa suspek, alas 9:30 sa gabii, Sabado, Septiyembre 7, 2024, sa Sitio Cejkalco, Brgy. Labangon, siyudad sa Sugbo.
Ang suspek mao si Arnold Cornador Magnanao alyas Anot, 48, molupyo ra usab sa maong lugar.
Matod ni Police Major Eraño Regidor, hepe sa Labangon Police Station, nakadawat sila og tawag sa telepono gikan sa usa ka concerned citizen nga dunay tawo nga nagdaladala’g armas.
Dali nga niresponde ang mga polis sa pagpangulo ni Police Lieutenant Raymart Rabanes, ang deputy station commander, ug pag-abot sa lugar, ilang naabtan ang suspek nga nagbitbit pa sa homemade nga kalibre .38 nga dunay tulo ka mga bala.
Sa pagsusi sa mga bulsa sa suspek, nakakuha ang kapulisan og usa ka container nga dunay sulod nga 10 ka pakete sa gituohang shabu nga motimbang sa .5 gramos nga dunay standard drug price nga P3,400.
Matod ni Regidor, base sa pamahayag sa mga silingan sa suspek nga dugay na kini nga nalambigit sa illegal nga drugas ug kon mahubog, magmaoy diin gikahadlokan kini sa mga tawo sa lugar.
Atol sa pagmaoy, nagdala-dala, matod pa, kini’g armas ug dayon panion sa mga moagi sa lugar.
“Drug personality ni siya nya tigmaoy pud ni, tig dala-dala og armas basta makainom ug kon magtama, manion sa mga silingan, siga gyud ni sa ilaha,” matod ni Regidor.
Nadakpan na kaniadto si Anot sa kaso sa illegal nga drugas apan nakagawas tungod sa plea bargain. / AYB
