Ben Madilynn
Nanghangyo sa publiko ang Phihealth sa pag-inat sa pasensya sa kalangay sa pagpatuman sa ilang gisaad nga pagpaumento sa coverage sa mga benepisyo nga makuha sa mga miyembro. Giluwatan kini sa kadagkuan sa Philhealth atubangan sa mga sakop sa Ubos Balay Balauranan nga nagpahigayon og congressional hearing.
Nabutyag man gud nga taliwa sa kamahal sa pagpaospital karon, ang ahensya sa kagamhanan nga kasandigan unta sa ordinaryong mga Filipino panahon sa kalisod sa pagpaospital, duna diay bilyones ka pesos nga pundo nga wa magamit busa ipabalik kini sa national treasury.
Makakugang kini nga kasayuran kalabot sa kadaku sa wa magamit nga pundo tungod kay daghan ang gaantos sa polisiya sa pribadong mga ospital nga di pagawason ang mga pasyente nga di makabayad o way kasiguroan nga makabayad.
Giumentuhan pa ang ilang binuwan nga premium alang sa mga trabahante apan wa na feel ang paglambo sa ilang serbisyo. Dunay mga deduction sa sweldo nga kapin na sa P1,000 matag buwan.
Wa pa nakalimot ang publiko sa nadiskobrehang mga anomaliya sa mao nga ahensya pipila ka mga tuig na ang nakalabay. Busa wa kaayo makadawat og paborable nga tubag sa publiko ang pagsaka sa kontribusyon sa matag ordinaryo nga Pinoy kinsang hinaguan kaltasan kada sweldo.
Kanus-a pa kaha palambuon og maayo sa Philhealth ang ilang serbisyo aron unta ang matag Pinoy nga maospital di ma-harass og sayon sa mga ospital. Nga halos ipamaligya o iprenda na lang ang kalag tungod sa kadako sa bayrunon sa tambalanan.
Laliman ka, naa diay unused funds nga P89.9 bilyones nga magamit unta kaayo sa mga kabos apan gipakatulog lang sa ilang kaban. Gani wa na unta kinahanglana ang umento sa premium sa ordinaryong mga mamumuo kay naa man diay “sobra nga pundo” ang ahensya. Inay umentuhan, tibhangan ang kontribusyon.
Tinuod dunay mga sektor nga nagsupak sa pag-uli sa P89.9 bilyones ngadto sa National Government, apan daghan sab ang wa nagsuporta ning mao nga tinguha tungod kay way naka-feel sa paglambo sa ilang serbisyo sa pag-abag sa panginahahanglang medikal sa mga Pinoy.
Kay hangtod karon, makahahadlok ang pagpaospital tungod sa kamahal bisan duna untay Philhealth nga kasandigan. Sumala gud, dinhi sa Dakbayan sa Sugbo dunay inahan nga namatay sa miaging buwan, apil na ang iyang gihimugso, tungod kay nabalaka siya nga “panguwartahan” lang sa mga doktor.
Wa siya nagpadala sa ospital tungod sa giingong kabalaka nga wala siyay ikabayad sa ospital. Sa yano nga mga tawo, wa sila naka feel sa hingpit nga mga benepisyo gikan sa Philhealth. Di na unta kahadlukan ang tambalanan kay duna kay masandigan nga buhatan sa kagamhan.
