Ben Madilynn
Nakabsan sa ilang kinabuhi ang magtiayon nga sakay sa ilang motorsiklo human nga nagkabangga sa gikasugat niini nga dump truck sa highway sa Barangay Tajao, Lungsod sa Pinamungajan, Lalawigan sa Sugbo.
Ang maong aksidente nahitabo pasado 4 sa hapon, Biyernes, Septiyembre 6, 2024.
Sigon sa imbestigasyon sa Pinamungajan Police Station ubos sa pagdumala ni Police Major Gilfred Baroman nga ang magtiayon nga nailhan nga sila si Jose Nadera Jr., 19 ug misis niya nga si Dejie, 23 nga taga Kalubihan 1, Barangay Ilihan, Toledo City, Cebu.
Samtang ang drayber suspek sa Howo dump truck nga si Jayson Ortega, 31 nga taga-Lungsod sa Carmen, Cebu.
Nasayran nga ang magtiayong Nadera paingon sa habagatang bahin samtang ang dump truck nagsubay sa lane nga paingon sa norte nga bahin.
Alegasyon ni Ortega nga iya nang nabantayan ang motorsiklo sa unahan nga matod pa migawas sa lane kay giingong mi-overtake sa laing trak de karga nga diha sa ilang atubangan.
Sumala pa ni Ortega nga mi-apply siya og brake apan wa gilayon makahunong ang iyang gimaneho nga trak ug misarasay.
Naabtan ang motorsiklo hinungdan nga naigo ug nalabay ang motor ingon man ang mga sakay niini.
Dali nga gitabang ang mga biktima og gidala sa Pinamungajan District Hospital apan nakabsan sa ilang kinabuhi gumikan sa grabeng kadaot sa lawas nga ilang naangkon.
Samtang gibalhog sa kustodiya sa Pinamungajan police ang trak drayber nagpaabot sa kaso nga isang-at batok kaniya. / DVG
