Ben Madilynn
Samaran ang usa ka 50 anyos nga lalaking hubog human pusila sa polis nga iyang gidunggab sa mahait nga hinagiban sa luyo sa Miller Hospital, Barangay San Nicolas Proper Dakbayan sa Sugbo alas 8:30 sa gabii, Biyernes, Septiyembre 6, 2024.
Ang suspetsado giila nga si Alfredo Flores Merenillo, 50, residente sa Flores Compound E.V Abellana Street Barangay San Nicolas Proper, Syudad sa Sugbo.
Matod ni Police Captain Jay-R Palcon, hepe sa Sawang Calero Police Station 6 nga ang suspetsado labihan ka hubog ug pugos kini nga misulod sa apartment sa maong lugar nga gipanag iya ni alyas Rodelito, 34.
Ang silingan sa biktima mao nay nanawag og polis nga naa nag-beat patrol sa usa ka convenience store sa N. Bacalso dili layo sa dapit aron mabadlong ang suspetsado ug madala sa police station.
Dali nga miresponde si Police Patrolman Mark Sinag sakop sa Cebu City Mobile Force Company uban ni Patrolman Psalm Gornes ug gibadlong kini nga mokalma.
Apan inay nga mopatuo giingong iyang gi atake si Patrolman Sinag pinaagi sa pagdunggab sa dala niini nga ice pick ug maayong nalang mitama ngadto sa gitakin nga magazine sa armas nga diha sa iyang bandolier.
Niatras si Sinag apan giingong miasdang ang maong hubog ug suway na sab nga mohansak ngadto sa polis hinungdan nga napugos si Sinag sa pagpusil diin naigo sa kamot ug tiyan.
Dali sab nga nanawag og ambulansya ang maong mga polis aron madala sa Cebu City Medical Center si Alfredo ang suspetsado apan gibalhin kini sa Vicente Sotto Memorial Medical Center nga padayon pa nga gi obserbahan sa mga doktor. Dugang ni Palcon nga base sa pamahayag sa mga silingan nga kon mahubog ang suspetsado kanunay kini nga mag-wild. “Nawawala daw siya sa isip nya, palagi din yan siya naalarmahan diyan sa lugar na yan kay palagi din lasing,” matod ni Police Captain Palcon. / AYB
