Ben Madilynn
Di igbali kung pila mo ka adlaw o tuig nag date una magpakasal kay daghan bitaw’ng tinuig nag-ipon o nag-uyab apan human sa engrande’ng kasal nagbuwag ra gihapon.
Duna say uban nga whirlwind ang relasyon, human sa usa ka semana nga nag date, naka desisyon dayon nga magpakasal unya milungtad ang kaminyuon hangtod sa ilang katiguwangon.
Unsa may mga timailhan nga kanang imong uyab o live-in karon angay na nimong pakaslan?
Matod sa Elite Daily nga basahon, kamong duha naa sa parehas nga pahina kung maghisgot og kaugamaon. Importante kaayo nga ikaw og ang imong ma bana/asawa parehas og panan-aw kung unsay gusto ninyo’ng mahitabo, ang inyo’ng mga damgo, gusto’ng negosyo o panginabuhian o klasi sa pagpuyo, maglain ba o dinha na magdukot og puyo sa mga ugangan.
Sunod bation nimo ang kalinaw. Di ka magduha-duha og huna-huna nga ang imong ma pares way paglubad nga nahigugma nimo kay kahibalo man ka nga ikaw iyang gibathala ug ikaw sab ngadto niya.
Andam naka makigminyo niya kung bation nimo nga di naka kinahanglan pang magpaka-aron ingnon. Natural ra nga sa bag-o pa inyong relasyon naa kay ipakita sa atubanagan nga mga nindot nga hiyas ug kina-iya padungag sa pusta. Apan ready na nimo siyang pakaslan kung di naka mistil pang mag-effort kay naman niya ang tinuod nga pagka-ikaw.
Kamong duha dunay lawom nga pagsalig sa usag-usa ug sa inyong relasyon. Imong mabati nga makasalig ug kompiyansa ka niya unya nga kamong duha maninguha para ang inyong relasyon himsog ug molahutay sa dayon.
Una mosalop ang adlaw, kamong duha makasinati og pagsinabtanay ug respito bisan pa man sa mga unos ug bagyo nga naagi-an.
Ang kaminyuon di duwa-duwa o trial and error. Kinahanglan kini og panahon sa paghuna-huna sa inyong duhang mga prinsiyo, panan-aw sa kaugmaon, pagsalig og labaw sa tanan ang tim-os nga paghigugma.
Busa, ayaw pag dali-dali o pa dikta sa mga tawo nga nagpalibot nimo kung kanus-a magminyo kay ikaw ug ang imong pares man maoy magbuot.
