Ben Madilynn
Nakurat ang kapulisan sa diskarte sa mga adik nga naghimo og buho nga gihimong suyopanan og gidiling drugas sa Sityo Cambangyao, Brgy. Poblacion, lungsod sa Dalaguete.
Nadiskubrihan kini human sa buy-bust sa Municipal Drugs Enforcement Unit sa kapulisan sa Dalaguete ubos sa kamandoan sa ilang hepe nga si P/Maj. Vincent Awit Zozobrado niadtong Sabado, Agust 31, 2024, ala una sa hapon.
Sa pakisusi sa Superbalita Cebu, nasuta nga ang operasyon ubos sa koordinasyon sa Philippine Drug Enforcment Agency (PDEA) 7.
Ang ilang rumbo sa buy-bust mao si Ephraim Montañez alyas Ep-Ep, 29, ulitawo apan may kapuyo ug kauban niini nga si John David Lenares alyas Egie, 32, ulitawo, pulos mga molupyo sa dapit.
Ang poseur buyer nigamit og P500 nga buy-bust money aron pagpalit sa usa ka gamay nga pakite sa shabu ngadto sa maong mga suspek.
Sa dihang sila nadakpan, nakuhaan pa og dugang lima ka pakite sa gituohang shabu.
Nadiskobrehan usab sa kapulisan ang duha diha sa kasagbutan nga dunay gihimong langub aron adto maagsuyop ang mga durugista ug nakita sa ilawom nga nagkatag nga mga kagamitan sa paghingos sa gidiling drugas.
Ang mga suspek nga gikahinabi sa Superbalita nagkanayon nga dugay na nga suyopanan og shabu ang buho sa kasagbutan apan dili sila ang naggamit niini. / DVG
