Ben Madilynn
Duha ang patay ug napulo ang nangaangol sa duha ka managlahing trahedya sa parehong pagkalusno sa riprap sa dakbayan sa Sugbo niadtong Dominggo, Septiyembre 1, 2024.
PUNTA PRINCESA
Usa patay samtang lima ang nangaangol sa pagkalusno sa riprap nga gipanag-iya sa usa ka negosyante sa kilid sa Kinalumsan River sa Buhisan Road, Barangay Punta Princesa, alas 3:45 sa kaadlawon atol sa pagbunok sa kusog nga uwan.
Sa pagkalusno sa riprap, naapektohan ang kabalayan sa tabok sa sapa nga sakop na sa Sitio Caduloy, Barangay Tisa nga nitabon na ngadto sa sapa.
Ang nakalas giila nga si Jemimah Ibuña, 17, junior high school, residente sa Sitio Caduloy, Barangay Tisa samtang ang lima ka angol dali nga gidala sa Cebu City Medical Center (CCMC) nga nakaangkon og mga samad sa lawas.
Matod sa igsuon sa biktima nga si Junil Ibuña, 23, nga mibunok ang kusog nga uwan ug kalit lang nga duna silay nabati nga kusog nga paka nga ila lang gibaliwa.
Pagka pasado alas 8 sa buntag sa iyang pagmata, natingala na lang siya nga ang ilang balay natabonan na sa riprap sa sapa nga maoy hinungdan nga ilang gisusi kon duna bay natabonan nga miyembro sa ilang pamilya.
Dali sila nga nanawag og tabang ug dali usab nga naabot ang mga personnel sa Bureau of Fire Protection nga milusad dayon og search and rescue apan pagka pasado alas 9 sa buntag napalgan na lang ilawom sa riprap ang biktima nga si Jemimah nga natabonan sa yuta nga wala nay kinabuhi.
Si Harold Alcontin, pangulo sa Cebu City Disaster Risk Reduction and Management Office (CCDRRMO), nagkanayon nga sa ilang pagsusi nga tungod sa kakusog sa ulan, ang tinambak nga yuta sa riprap habig sa Buhisan Road sa Punta Princesa maoy nakapabug-at niini ug hinungdan nga nibigay kini ug tungod sa katas, didto nitugpa sa kabalayan sa Sitio Caduloy.
Dugang ni Alcontin nga kasagaran sa mga tawo sa maong oras nangatulog ug walay kalibutan sa pagbunok sa kusog nga uwan.
“Tungod sa tinambak, mi-saturate ang yuta, mibug-at, wala na makaato ang iyang riprap unya ni-collapse padung sa balay sa pikas,” pasabot n Alcontin.
Dugang niya nga ilang gipangsusi ang kabalayan sa maong lugar ug ilang nasuta nga dunay walo ka panimay ang peligro na nga puy-an.
Gumikan niini, ang mga namuyo sa walo ka mga panimalay kasamtangan una nga gipabakwit sa National High School sa Barangay Tisa samtang gi-assess pa sa CCDRRMO ang kondisyon sa lugar kon mamahimo pa ba kini nga puy-an ilabi na nga nagsige pa ang pag-uwan-uwan.
Gibutyag ni Alcontin nga sa walo ka balay nga naapektohan sa pagka hagsa sa riprap, upat niini ang grabe nga naguba samtang ang laing upat ang dunay ginagmay nga danyos.
Ang Labangon Police Station sa pagpangulo ni Police Major Eraño Regidor nagpadala na og police personnel sa dapit aron pa butangan og police line ug gidid-an ang mga residente nga makapaduol.
SAN JOSE
Samtang pasado alas 11 sa buntag sa samang adlaw, nahugno usab ang laing riprap sa likod nga bahin sa luna nga gipanag-iya usab sa usa ka inila nga negosyante sa Sugbo sa Purok 5, Barangay San Jose, dakbayan sa Sugbo.
Matod ni Alcontin duha ka panimalay ang apektado diin usa ang nakalas samtang upat ang naangol sa maong hitabo.
Ang nakalas giila nga si Claire Dosdos, 26, natabunan dihang nahugno ang ilang balay gumikan sa pagbigay sa riprap. / Dugang ni DVG
