Bossing gisilat ang Kings

Mibuhat og makabungog nga upset ang Blackwater Bossing sa ilang pagtuhog sa inilog nga Ginebra Gin Kings, 95-88, Biyernes sa gabie, Agusto 30, sa Philippine Basketball Association (PBA) Governor’s Cup sa Ninoy Aquino Stadium.

Ang replacement import nga si George King maoy niaswat sa Blackwater aron mikuha ang unang daog sa franchise batok Gin Kings sulod sa lima ka tuig.

Si King, kinsa mipuli kang Ricky Ledo, mipakatap og 33 puntos ug 19 rebounds lakip na ang 2-of-6 shooting sa bag-o nga four-point line sa iyang PBA debut.

Ang kanhi player sa Phoenix Suns ug Dallas Mavericks sa National Basketball Association (NBA) mao pud ang nakahatag og unang daog sa Bossing human sa parat nga 0-3 nga sugod sa conference.

Nakatakod ang nindot nga performance ni King sa iyang local teammates.

Miamot si Sedrick Barefield og 13 puntos, midugang si Christian David og 11 puntos samtang si Troy Rosario mitunol og 10 puntos.

Nakaluwas ang Bossing sa mainit nga kamot ni Justin Brownlee nga mitapos og 37 puntos ug ni Japeth Aguilar nga dunay double-double 17 puntos ug 10 rebounds.

Ang Gin Kings natagak sa 1-2 (win-loss) record sa Group B, kinsa gipangulohan sa way pilde nga Rain or Shine (4-0) gisundan sa San Miguel Beermen (2-1) ug NLEX (2-1).

Sa laing duwa, nagpabiling limpyo ang rekord sa Rain or Shine Elasto Painters human nila gilubong ang Phoenix, 116-99.

Mibirada si Aaron Fuller og 28 puntos ubanan sa 22 rebounds samtang si Adrian Nocum mikamada og 21 puntos alang sa Rain or Shine nga misaka sa 4-0 rekord.

Puntos matag usa:

1st game:

Rain or Shine (116) – Fuller 28, Nocum 21, Clarito 15, Caracut 13, Mamuyac 9, Tiongson 8, Santillan 6, Datu 6, Belga 5, Ildefonso 4, Asistio 1.

Phoenix (99) – Jazul 12, Alejandro 12, Ballungay 11, Rivero 10, Muyang 9, Tio 8, Salado 8, Perkins 8, Verano 7, Tuffin 5, Mocon 5, Daves 4.

2nd game:

Blackwater (95) – King 33, Barefield 13, David 11, Rosario 10, Guinto 9, Kwekuteye 8, Ilagan 5, Chua 4, Escoto 2.

Ginebra (88) – Brownlee 37, Aguilar 17, Abarrientos 10, Ahanmisi 9, Holt 5, Thompson 4, Go 4, Adamos 2. / RSC