Mga leksyon sa Covid-19 taliwa sa mpox

Dunay gidudahan nga mga kaso sa mpox dinhi sa rehiyon 7, maoy gitataw sa Dept. of Health (DOH 7). Ila ning giluwatan taliwa sa mga estorya ug hungihong nga duna nay kompirmadong mga kaso sa mpox dinhi sa Sugbo.

Gitataw sa DOH 7 nga moagi pa og mga proseso una pa makompirmar nga kaso kini sa mpox. Natural nga moagi kini og laboratory tests. Sa ato pa, di lang makausa, kon di pipila ka mga test ang mokompirmar niini. Angay man tuod kabalak-an ang mao nga sakit kay mananakod, apan ang pagpakatap og mga estorya nga makapahadlok sa publiko di sab maayo. Makaapekto kini sa naandan nga kinabuhi sa katawhan.

Hinuon, di usab maayo kon itago sa DOH 7 kon asa kining mga dapita kon makompirmar man nga kini mpox kay mas maayo nga mahibaw-an asa kini nga lugar sa ingon maalerto ang publiko. Angay usab nga paminawon ang awhag sa DOH nga mag-obserbar sa minimum nga pagpanagana, sama sa pagsul-ob og facemask kon naa sa publikong lugar ug kanunay nga manghugas sa mga kamot. Kini nga protocol sama gyud sa panahon sa Covid-19.

Angay bang kabalak-an ang mpox? Mismo ang World Health Organization (WHO) niisip na ini nga hulga sa panglawas busa angay nga magmatngon, apil na sa pakighilawas nga usa sa nabantayan nga paagi sa pagpanakod.

Karon nga tingklase na, mas magdoble ang mga ginikanan ug kabataan sa pagmatngon pinaagi sa pagsanong sa awhag sa DOH sa pagmintinar og minimum nga paagi sa pagpanalipod sa panglawas. Kon duna may mga simtomas nga makit-an, angay nga i-report dayon sa mga hingtungdan o kon ikaw man gani mismo ang natumngan, angay ka nga motaho ngadto sa mga otoridad, sama sa mga barangay health personnel.

Ang barangay officials mismo kinahanglan nga aktibo nga magsusi ug magpakisayod kon dunay kadudahan nga kaso sa ilang dapit. Namatud-an na kini nga epektibo panahon sa Covid-19. Kon molugak ang barangay, dali nga makakatap ang sakit.

Sa ato pa, frontline ang barangay sa kombati ning sakita gihapon. Sama sa gibuhat sa Covid-19 nga nalabang na karon sa publiko, kabalak-an apan di angay nga kahadlukan og maayo ang mao nga mananakod nga sakit. Kay ang tumang kahadlok makaparalisar sa kinabuhi sa katawhan. Apan ang grabeng kompyansa makapakaylap usab og dali sa sakit, sama gihapon sa nahitabo sa pandemic, di lang dinhi sa Pilipinas, kon di sa tibuok kalibutan.

Angay nga hinumduman ug kat-unan ang mga leksyon sa Covid-19.