Ben Madilynn
Kanhi entertainment columnist sa Superbalita Cebu ug SunStar Cebu nga si Roger P. Serna, nitaliwan na sa laing kinabuhi sa edad nga 72 niadtong Agusto 23, ipahiluna sa iyang lubnganan sa public cemetery sa lungsod sa Oslob, alas 2:00 sa hapon karong adlawa, Dominggo, Septiyembre 1, 2024, human sa misa requiem sa simbahan sa Immaculate Concepcion Parish.
Si Serna, tinahod nga personahe sa entertainment media sa Sugbo, nahimo nga dakong kabahin sa kalamboan sa lokal nga industriya sa kalingawan dili lang isip magsusuwat ug kolumnista apan aktibo sa pag-arte ug pag-awit.
Usa siya ka aktibong miyembro sa Entertainment Group ubos sa Cebu Federation of Beat Journalist (CFBJ) nga gipangulohan ni Arnold A. Bustamante.
Ang CFBJ nihatag og pinansiyal nga hinabang ngadto sa pamilya ni Serna nga gihatod ni Herty B. Lopez, entertainment editor sa Superbalita Cebu ug bise presidente sa CFBJ, uban nila ni Superbalita News Editor Flor V. Querubin ug Superbalita Editor-in-Chief Rolando R. Morallo niadtong Sabado, Agusto 31, 2024.
Sumala sa iyang kabanay, si Serna namatay tungod sa pag-ataki sa sakit sa kasingkasing ug ubang komplikasyon samtang diha sa iyang panimalay sa Brgy. Poblacion, Oslob.
KASINATIAN
Gisugdan ni Serna ang iyang karera sa journalism isip usa ka magsusulat ug editor alang sa publikasyon sa mga estudyante sa Southwestern University, The Quill.
Usa sa iyang unang mga trabaho mao ang usa ka part-time nga trabaho sa Vistas nga magasin, diin iyang gibansay ang iyang kahanas sa pagsulat.
Human sa iyang graduwasyon sa kolehiyo, si Serna nagtrabaho isip accountant sa SunStar Cebu sa wala pa mopadayon sa pagsulat sa mga entertainment column alang sa publikasyon.
Sa dihang gi-hire si Serna isip leisure editor sa kanhi Newstime Daily, mas nakagugol siya sa iyang panahon sa pagsulat, nga maoy usa ka kausaban sa iyang karera.
Nakatabang sab ang iyang kanhing mga posisyon sa sunod niyang trabaho isip administrative officer ug information officer sa public information office sa Cebu Provincial Government hangtod nga niretiro sa trabaho sa edad nga 60.
Bisan pa sa iyang bag-ong mga responsibilidad, nagpadayon siya sa pagsulat sa iyang mga kolum ug nagpabilin nga nalambigit sa media.
Nisuway sa siya sa pagsulod sa pulitika kandidato sa pagka konsehal sa lungsod ubos sa partido sa administrasyon apan napakyas.
Hinuon, gikuha siya nga kawani sa munisipyo sa Oslob ug akibo sa kalihokan sa simhahan isip choir member. /RRM
