Ben Madilynn
Nagpadayon ang subsob nga operasyon sa kapulisan batok sa illegal numbers game nga Swertres nga miresulta sa pagkasikop sa 19 ka tawo nga nalambigit sa maong sugal.
Lakip nga nasikop ang coordinating ug usher nga nadakpan sa managlahi nga dapit sa probinsiya sa Sugbo.
Ang Cebu Police Provincial Office (CPPO) walay hunong sa ilang “Big-time operation” batok sa mga nagpadgan sa illegal numbers game nga Swertres.
Ang mga dinakpan naglakip nila ni: Monalisa, 36, Naga City; laing nasikop mao si Bern, 39, Lungsod sa San Remegio nga giila nga big time coordinator uban sa usher nga si Delfin, 38, taga-San Remegio.
Sa Lungsod sa Badian nadakpan sila si Ferdie, 53 ug Jess, 31 nga taga Brgy. Banhigan, sa naasoy nga lungsod.
Sa Lungsod sa Medellin napusasan si Kevin, 38, ug Edgardo, 28, pulos taga Sitio Bangkal, Brgy. Dayhagon.
Samtang ang kapulisan sa Liloan nakasikop sab og tulo ka usher sa Swertres.
Sila si Police Lt. Col. Antonio Ananayo, hepe sa Provincial Intelligence Units PIU /Provincial Drugs Enforcement Unit (PDEU) CPPO nisikop sab og laing siyam ka tawo nga nalambigit sa maong sugal naidtong Agosto 29, 2024 sa Brgy. Manlagtang, Lungsoud sa Tabogon.
Ang maong mga dinakpan mag-atubang sa kaso nga kalapasan sa RA 9287 kon Illegal Numbers Game. / GPL
