Balay sa taas nga opisyal sa kapulisan, gilungkab

Usa ka polis nga nagranggo og lieutenant colonel nidangop sa buhatan sa kapulisan sa Cordova tungod sa paglungkab sa iyang balay sa Barangay Gabi ug ila kining nadiskubrihan sa pagka alas sa 7:50 sa buntag, Miyerkules, Agusto 28, 2024.

Ang opisyal sa polis nadestino sa mobile patrol unit sa dakbayan sa Lapu-Lapu apan nagpuyo sa naasoy nga dapit.

Matod sa polis nga nahiuli sa balay aron pag-ilis og uniform apan namatikdan nga gilungkab na ang pultahan sa balay ug nabungkag na ang mga butang sa sud.

Wa matino sa taho kon wala usab ang pamilya sa polis nianang gabii.

Nawagtang na ang iyang personal nga .38 revolver nga armas nga mobalor og P25,000, Gshock nga relo nga balor og P5 mil ug Oakley shades nga tag P8 mil, ug P1,200.

Ang kapulisan sa Cordova padayon pa nga nag-imbestigar sa maong kaso. / DVG