Ben Madilynn
Nabalhog sa custodial facility sa Mabolo Police Station ang duha ka mga lalaki nga nagsumbagay atol sa piyesta sa Back APM, Barangay Mabolo sa dakbayan sa Sugbo alas 3:00 sa kaadlawon, Biyernes, Agusto 30, 2024.
Ang mga nabilanggo mao sila si Felix Simecas Villegas Jr, 27, construction worker, ug Lear Cose Dabon, 36, tourist driver nga pulos residente sa maong lugar.
Nakadawat og tawag sa telepono ang Mabolo Police Station gikan sa mga residente sa dapit nga dunay duha ka tawo nga bisan unsaon sa pag-uwang dili mopatuo ug nagpadayon gyud kini sa pagsinumbagay.
Dali nga niresponde ang mga polis ug ilang naabtan ang duha nga pulos na nangabun-og ang ilang mga nawong ug nakahatag na sila’g kasamok sa mga molupyo sa dapit.
Matod ni Felix nga si Dabon ug ang iyang amahan maoy dunay panagbangi tungod lang sa ka ‘suya-suya.’
Apan sa dihang sila nag-abot sa usa ka disko tungod sa ilang tinuig nga piyesta ug pulos na nakainom, nagkainitay silang duha ug nagkalalis nga misangpot ngadto sa sinumbagay.
Tungod kay nakahatag na sila’g kasamok, ang duha gipangdakop sa kapulisan ug mag atubang og kasong Alarm and Scandal. / AYB
