Ben Madilynn
Patay ang drayber sa awto nga nibangga sa usa ka balay sa Sityo Libo, Barangay Mohon, siyudad sa Talisay, pasado alas 4 sa hapon, Huwebes, Agusto 29, 2024.
Subay sa imbestigasyon sa traffic police sa Talisay, ubos sa kamandoan ni P/Lt. Col. Epraem Paguyod, naila ang drayber sa ngan lang nga ‘Alberto Jr.’, 41, ug taga Phase 3, Deca Homes sa Tungkil Minglanilla, Sugbo.
Matod pa nga sa dihang niagi sa maong dapit ang awto nakita sa mga saksi nga nag-ikis-ikis og dagan hangtod nga nidasmag ngadto sa balay nga ginama sa light materials.
Usa ka ‘Juanito’, 79, kinsa tag-iya sa balay, angol tungod sa maong insidente.
Sila si Alberto Jr. ug Juanito pulos gipangdala sa tambalanan apan si Alberto nakabsan sa iyang kinabuhi.
Ang kapulisan nihulagway sa hitabo nga self accident sanglit walay laing sakyanan nga nalambigit sa aksidente.
Usa sa gidudahan sa kapulisan nga giataki ang drayber sa iyang wa pa matino nga balatian sa lawas. / DVG / Hulagway gikan sa FB post sa City of Talisay Traffic Orepations and Development Authority
