Ben Madilynn
SA IKAPITO nga adlaw sa isyu batok Police Regional Office (PRO) Davao Region ug Kingdom of Jesus Christ (KOJC) sa pagpangita sa founder sa KOJC Pastor Apollo C. Quiboloy, miabot sa compound sa KOJC si Davao City Police Office (DCPO) director Police Colonel Hansel Marantan.
Kauban ni Marantan ang pipila niya ka mga pulis sa DCPO, apan lahi ang bersiyon niini nga gikadayeg sa mga netizens, Biyernes, Agosto 30, 2024.
Pipila ka mga netizens ug mga miyembro sa KOJC ang midayeg kang Marantan gumikan kay mihangop kini sa mga miyembro, nangumusta ug nakig-selfie pa.
Wala na mihatag og pamahayag si Marantan, diin siya nakighimamat lamang sa mga miyembro ug iyang gikumusta ang kahimtang.
Sa pikas bahin, viral karon sa social media ang gikadudahan sa KOJC members ug sa mga netizens nga usa ka tigulang, bata ug pipila ka mga naka-PNP athletic uniform nga misulod sa compound.
Giingon sa mga netizens nga dili kini mga tinuod nga mga sakop sa kapulisan gumikan sa ilang linihukan ug mga pustora niini subay sa na-post sa SMNI News.
Sa habig sab sa kapulisan, hugtanong gikondena sa Philippine National Police (PNP) ang giingong pagpang-laser sa KOJC sa helicopter sa security forces kini suma sa taho sa dxDC RMN Davao.
Una nang gikanayon sa PRO-11 nga ang maong buhat nahimo matud pa kining hulga sa seguridad ug operasyon sa kapulisan ug nanawagan sa sakop sa KOJC nga mamahimong mokooperar lang.
Kini nga hisgutanan, gitubag ni KOJC Counsel Atty. Israelito Torreon, pinaagi sa iyang Facebook ug gibarugan niini nga kinahanglan unang pamatud-an sa PNP nga ang maong laser, lihok ba sa KOJC members tungod pakyas ang PNP sa pag-verify niini ilabi pa nga daghang pwersa sulod ug gawas sa compound ug aduna usab mga tawo ug establisyemento duol sa area, suma sa taho.
Giingon nga posibleng pulis ra usab ang nagbuhat niini ilabi pa nga gatusan sila nga na-deploy sa compound diin sumala ni Atty. Torreon nga kung mapamatud-an sa PNP nga KOJC members ang responsable sa pagpang-laser, dili usab sila mabasol tungod sa ilang giingong kasinatian ug harassment sa kamot sa kapulisan.
Human nga daw namingaw ang KOJC compound sa Carlos P. Garcia Highway, ang ubang mga pulis giingong naa na sab sa KOJC compound sa Tamayong, Calinan, Davao City aron pangitaon si Quibloloy. (JPC)
