Ben Madilynn
Naugdaw ang usa ka bodega nga nahimutang sa Sityo Kawit, Barangay Ermita, Dakbayan sa Sugbo Huwebes sa kadlawon, Agusto, 29, 2024.
Ang maong bodega gipanag-iya ni Ryan Yaturo nga giabangan nila ni Saldy Vicente, 61 ug Jeffrey Estrada, mga negosyante sa Carbon Public Market.
Naapil sa pagkasunog ang usa ka trak de carga, duha ka motorsiklo ug stocks sa mga baligyaon sa Carbon sama sa mga kinarton nga harina, mantika, pansit, catsup, ug uban pa nga items.
Lakip sa nasunog ang 11 ka mga manok igtatari nga matod pa sa tag-iya nga pulos mga high breed ug ilang gigam pag-ayo.
Sumala pa ni Vicente nga duha lang sila sa iyang kargador ang matulog sa maong bodega matag gabii, apan sayo sila nga moadto sa Carbon aron moatiman sa ilang tindahan.
Nagtuo si Vicente nga posible nga mi-overheat nga electric fan ang tinubdan sa maong sunog kay adunay mga higayon nga malimtan kini sa pagpawong sa iyang sakop.
“Akong duda ang electric fan gyud kay dili man gud na usahay mapawong, nakadungog kog tingog sa bombero pero wala lang nako tagda kay abi nako mga balay ra.
“Sus, nagdagan ang akong tawo niingun nga ang bodega naman diay ang nasunog,” saysay ni Vicente.
Gibanabana sa kabomberohan nga moabot ngadto sa P6 milyunes ang danyos sa maong sunog.
Nadawat sa Cebu City Fire Office ang alarma sa 3:51 sa kaadlawon ug giisa sa first alarm sa 3:56 sa kadlawon ug napawong ang kayo sa mga 4:22 na sa buntag.
Wala na makakatap ang kayo sa laing building tungod sa kataas sa firewall. / AYB
