Ben Madilynn
Kapin sa P20 milyunes nga balor sa illegal nga drugas ang nasakmit sa mga sakop sa Regional Police Drug Enforcement Unit 7 inabagan sa Philippine Drug Enforcement Agency (PDEA) 7 atol sa gilusad nga buy-bust operation sa dalan J. Fortich, Banawa, Barangay Guadalupe, Cebu City.
Ang maong operasyon gihimo niadtong Miyerkules sa 7:30 sa sa gabii, Agusto 28, 2024 nga miresulta sa pagkasikop sa ilang target nga giila nga si Danilo Avenido Cabungcag Jr., 37, alyas Dolan, residente sa Barangay Guadalupe nga lumad nga taga Barangay Mahanay, Lungsod sa Talibon, Lalawigan sa Bohol.
Nakuha sa mga operatiba ang mga binulto sa gituohang shabu nga motimbang sa tulo ka kilo nga adunay standard drug price nga P20.4 milyunes.
Matod sa usa sa mga operatiba nga di magpahingan nga na-monitor nila ang lihok ni Cabungcag human sa mga dakop sa nanglabay nga mga operasyon.
Dinagko ang maabot nga supply sa suspetsado gani ikaduha na niya kini nga paghatod sa illegal nga drugas diin ang una naka deliver na siya og duha ka kilo niadtong Hulyo 2024.
Giingong naa sa sulod sa Cebu City Jail ang contact niini nga maoy manawag niya nga dunay moabot nga supply sa illegal nga drugas ug mao usab ang momando kon si kinsa ang iyang hatdan.
Human mamonitor ang iyang lihok, gilusad dayon ang buy-bust nga miresulta sa iyang pagkasikop.
Si Cabungcag tigluto og fried chicken ug pork belly sa usa ka food stall nga naa nahimutang sa Banawa ug giingong nadani sa dihang gihaylo sa iyang amigo nga mohatod sa illegal nga drugas bugti sa bayad nga P10,000.
Ang maong kaila taga Pasil apan naa na sa Bohol nagpuyo ug giingnan lang siya nga dunay ipakuha nga bag nga dunay sulod nga illegal nga drugas.
Didto niya kuhaon ang bag sa usa ka vulcanizing shop atbang sa gitrabahoan niya nga food stall sa Banawa apan wala matod pa siya kaila kon si kinsa ang nagbilin ug tawgan lang siya sa usa ka Engie kon asa ihatod ang maong bag.
Ang buhaton niya iyang buakbuakon ang sulod niini gikan sa kinilo ngadto sa tag 25 gramos ang matag putos ug ihatod dayon sa imando sa manawag kaniya.
Human mahatag ang maong supply hatagan na siya og P10,000 cash.
Napugos matod pa siya sa pagsulod niini tungod sa kalisod sa kinabuhi ug apiki usab siya sa kwarta.
“Naikag ra gyud ko sa suhol nga P10,000 maong nisugot ko nga mokuha ana ug ako sad ang mohatod,” matod ni Cabungcag.
Kalapasan sa Section 5 ug 11, Article II RA 9165 ang atubangon nga kaso ni Cabungcag. / Dugang taho gikan ni DVG
