Ben Madilynn
Sa labing uwahi nga inpormasyon nahipos sa Superbalita Cebu nga gilabang sa mainland Cebu ang biktima nga mabdos aron nga madala sa ospital kay gikinahanglan nga abunohan og dugo.
Gikatahong talandugon ang kahimtang sa 29 anyos nga inahan nga gitago sa pangalan nga Mitch human kini makaangkon og mga samad dinunggaban sa kilid nga bahin sa iyang lawas.
Ang suspek iya ra sab nga kapuyo nga gitago sa pangalan nga Roy, 33, helper sa tindahan.
Ang maong insedente nahitabo sa ilang balay sa Purok Chicos, Barangay Sungko, Lungsod sa Bantayan, Cebu niadtong Miyerkules sa gabii, Agusto 28, 2024.
Sigon pa ni Police Master Sgt. Joramie Bendecio, imbestigador sa Bantayan Police Station nga adunay init nga panaglalis tali sa duruha sa wa pa ang pagpanunggab.
Giingon nga giawayan nilang Mitch ug Roy mao ang sais anyos nga anak nga babaye sa biktima sa iyang kanhi gikarelasyon, nga gihilantan niadtong higayona.
Apan misaysay si Roy sa Superbalita Cebu nga gikan siya sa iyang trabaho niadtong higayona, gisugo gilayon siya ni Mitch sa pagpalit og tambal, biskwit ug orange drink kay gihilantan ang sais anyos nga anak ni Mitch.
Sa dihang nabalik siya gikan sa maong sugo, gihungitan pa niya ang bata nga nagluya apan napungot siya sa mga yawyaw sa biktima batok kaniya.
Human siya giingnan nga isipan o dawo ngadto sa iyang mga anak sa kanhi kaipon.
Si Mitch aduna nay duha ka mga anak sa iyang previous relationship, 8 years old nga lalaki ug ang 6 yrs. old nga babaye.
Atol sab nga anaa ang amahan ni Mitch hinungdan nga nagtagay sila ni Roy og ilimnong makahubog ug sa iyang pagpauli giingong giusban na sab siya og kasaba sa biktima.
Sa kapungot sa suspek mikuha siya og kitchen knife dayon dunggab sa iyang kapuyo, ug misurender ngadto sa kapulisan.
Sumala pa ni Roy na blanko siya niadtong higayona apan gibasulan niya ang iyang nahimo ngadto ni Mitch nga iyang gikaipon sud sa usa ka tuig ug pito ka buwan nga nagsabak sa ilang unang anak./ GPL
