Ben Madilynn
Nakabsan sa kinabuhi ang batan-ong ulitawo human gipusil samtang nagkaon niadtong Lunes sa gabii, Agusto 26, 2024, sa Sityo Tagatay, Brgy. Can-asujan, Siyudad sa Carcar.
Ang biktima giila nga si Kevin Rentor Elladora, 18, molupyo sa naasoy nga dapit, ug ang mamumuno wala pa mailhi hangtod karon.
Pag-abot sa kapulisan sa dapit, ilang naabtan nga ang biktima nagbuy-od na sa salog sud sa ilang kusina sa balay.
Sa imbestigasyon, nasuta nga samtang ang biktima nanihapon diha sud sa ilang kusina, kalit nga nisud ang mamumuno ug niingon nga “asa ang shabu?”
Gipusil sa makadaghan nga higayon ang biktima sa nagkadaiyang bahin sa iyang lawas ug gidala sa tambalanan apan gideklarar nga dead on arrival.
Ang mamumuno daling nisibat human sa pagpamusil ug wala na maabti sa kapulisan nga nitubag sa alarma. / DVG
