Kaunaan a Solar Powered Water System, nai-install iti Barong National High School iti ili ti Dingras
abyasa
LAOAG CITY – Maipagpannakkel ni Mr. Jay Lagateto, School Head ti Barong National High School iti ili ti Dingras, ti naballigi a pannaka-install ti umuna a Solar-Powered Water System iti nadakamat a pagadalan
Inbatadna a nainaguraran ti proyekto babaen ti induction program a tinabunuan dagiti nagdumaduma nga opisial ken kameng ti pagadalan.
Segun ken ni Mr. Lagateto, ti Solar-Powered Water System project ket donasion ni Consul Ren Faqiang, Consulate ditoy ciudad ti Laoag.
Kinunana a dakkel ti maiyeg ti proyekto, nangruna ta maysa kadagiti kangrunaan a parikut ti pagadalan ket ti kinakurang ti umdas a suplay ti danum.
Mainaog iti daytoy, ti proyekto ket aggatad iti PHP 170,000, agraman ti PHP 30,000 para iti frame wenno stand-na nga addaan iti kangato a 3 meters
Kinunana a dakkel ti maited a benipisio ti nadakamat a proyekto nangruna kadagiti agadadal iti Barong National High School.
Innayonna a timmabuno ti inagurasion da Atty. Donato D. Balderas Jr., Schools Division Superintendent; Joemelle Ernesti Saguid Go Sy, Municipal Administrator iti ili ti Dingras; Dr. Martina R. Agullana, Education Program Supervisor; Brgy.Chairman Jay Ashley Root; GPTA President Jimmy Orbeta; ken pakairamanan iti intero a faculty, staff, nagannak, ken estudiante.
Namnamaen ni Lagateto, a mangipaay iti umdas a suplay ti danum ti water system para iti intero a Barong National High School.
Innayonna a nagkiddaw isuna iti tulong iti Konsul babaen ti email no sadinno a nangipakita daytoy ti interes nga agdonar.
Kabayatanna, nagyaman ni Mr. Lagateto ken ni Consul Ren Faqiang ken kadagiti dadduma pay a stakeholder para iti dakkel a suportada iti nasao a proyekto.
