Ben Madilynn
HANGYO sa mga motorista nga dili na unta masubli pa ang tensiyon gawas sa Kingdom of Jesus Christ (KOJC) compound tali nga kapulisan aron nga dili na makulgot ang dagan sa trapiko ug ang mga trabahante.
Kini human giablihan na kagahapon sa udto ang Carlos P. Garcia Highway atubangan sa KOJC compound dihang nabalda kini sulod sa halos upat ka adlaw nga dili magian sa publiko.
“Open na ang highway,” mensahe sa Police Regional Office-Davao Region (PRO-11) pinaagi sa spokesperson Police Major Catherine Dela Rey, kagahapon ngadto sa mga tigbalita.
Ang drayber sa rotang Bunawan-Roxas miingon nga dako kaayo nga purwesyo sa mga motorista ang nahitabo nga tensiyon sa CP Garcia Highway, ug niya pa nga unta dili na kini masubli.
“Kana kay nakasulod naman ang mga pulis sa compound sa KOJC, didto na sila mohimo og tapok sa sulod, kay daghan makulgot, mga estudyante, trabahante ug bisan ang among pamugas ani,” ingon ni Richard Quezon, 51-anyos, taga Barangay Sasa, siyudad sa Davao.
Alas 10 sa buntag kagahapon, Agosto 27, 2024, ang 2,000 ka mga pulis ug ang dugang puwersa niini naka-ukopa sa KOJC compound diin asa makita sa mga hulagway nga gi-share sa SMNI nga naa ang mga pulis sa Jose Maria College (JMC) building.
Makita nga nanghigda ang mga pulis sa hallway, dunay mipahimulos sa tubig nga naa sa water dispenser ug ang uban miambit sa pag-charge sa ilang mga cellphone.
Sa pagsuwat ning balita, suma sa tigpamaba sa PRO-11, padayong nanuhid ang mga pulis sa posibleng mga bunker sa compound human nga alegasyong naka-detect ang ilang radar og heartbeat nga naa sa ground.
Dako pa gayud ang pagtuo sa mga pulis nga naa lamang sa compound sa KOJC nagtago si KOJC Pastor Apollo C. Quiboloy ug ang laing mga kaubanan niini nga giakusar.
Wala pa mihatag ang PRO-11 og dugang updates sa ilang padayong pagsubay sulod sa compound, apan ang kampo ni Quiboloy padayon sab nga mibantay sa mga giingong posibleng himuon sa kapulisan nga madaut ang imahe sa ilang simbahan.
Kagahapon sa buntag, Agosto 27, 2024, human sa usa ka hamubo nga press conference sa kampo sa KOJC, ang ilang legal counsel nga si Atty. Israelito Torreon, nag-file og Temporary Restraining Order/Injunction versus nila PNP chief General Rommel Francisco Marbil, PRO-11 director Brigadier General Nicolas Torre III ug ni Davao City Police Office (DCPO) director Police Colonel Hansel Marantan ug pipila ka mga police officers sa Branch 15 sa Regional Trial Court (RTC) Davao.
Apan gipaklaro ni Major Dela Rey nga dili hinungdan ang TRO nga gi-file ni Atty. Torreon sa RTC-Davao sa pag-abli sa CP Garcia Highway, kon di gihimo kini sa mga pulis, gumikan wala na ang bagang-ihap sa mga miyembro sa KOJC nga alegasyong mibabag sa ilang gihimo nga operasyon ug gitan-aw sa kapulisan ang sitwasiyon sa riding-public, busa giablihan ang kalsada.
Misulod si Atty. Torreon alas 3 sa hapon kagahapon sa KOJC Compound kinsa miingon kini nga ang RTC Davao nagmando sa PNP og usa ka cease and desist order sa ilang operasyon.
Sa pagsuwat ning maong balita, PRO-11 wala pa’y tubag niini. (JPC)
