Ben Madilynn
GITUBAG sa tulo ka dagkong airline companies nga nagserbisyo sa Francisco Bangoy International Airport ang “flexible booking” sa ilang mga pasahero diin puwede nga makadesisyon ang mga pasahero sa ilang naka-schedule nga biyahe.
Sumala sa Cebu Pacific ug sa Philippine Airlines (PAL) nga puwede nga i-rebook o di kaha ma-full refund ang kantidad sa ticket ugaling dili kini masakyan gumikan nagulgot ang pasahero sa nagpadayong tensiyon sa Kingdom of Jesus Christ (KOJC) compound diin tapad ra niini ang Davao International Airport (DIA).
Apan sumala sa nasampit nga airline companies nga kadto lang mobiyahe sa Agosto 26, 2024, mausab pud kini nga schedule diin ang mga pasahero gipahimangnoan nga mag-monitor sa ilang mga email ug sa mga pahibalo sa ilang mga official Facebook pages.
Una niini, gibutyag ni DIA manager Rex A. Obcena nga walay nahitabo nga pagkadelatar sa mga flights apan kinahanglan magsayo sa airport aron dili mabiyaan sa ilang mga naka-schedule nga flight.
Alas 7 sa gabii, Dominggo, Agosto 25, 2024, temporaryong gisirhan ang exit point sa DIA diin mogawas na sa entrance road.
Gikan sa Buhangin makasulod ang sakyanan sa Davao Airport entrance. Ang mga sakyanan gikan sa North Bound Area (Panacan) paingon sa Buhangin, dili makaagi, mamahimong motuyok sa Cabantian lusot sa Esperanza padung airport.
Normal Operation ang Davao International Airport luyo sa nagpadayong tensiyon sa gawas nga bahin sa airport kagahapon. (JPC)
