Ben Madilynn
USA ka bantogan nga personalidad sa online kinsa nagtinguha nga magpapili pagka-mayor sa siyudad sa Davao na-diskuwalipikar sa pagsalmot sa 2025 local elections.
Si Roweno Rosales Caballes, nailhan isip “Boy Isog Sarge,” nagbutyag sa usa ka pahayag niadtong Sabado, Enero 11, 2025, nga ang iyang certificate of candidacy (COC) wala giila sa Commission on Elections (Comelec) tungod sa giingong wala pagtuman sa “specified COC form” ilawom sa Comelec Resolution 11045.
Gikanayon ni Caballes nga ilawom sa Section 35 sa resolusyon, kini nagkanayon nga ang COC form nga gamiton alang sa 2025 midterm elections mao ang dunay nakasukip nga Annexes “K to K-9,” nga wala malakip sa COC nga ilang gisumite.
Matud niya nga ang Comelec nagpadala og suwat kaniya niadtong Disyembre 10, 2024, nga nagpahibawo nga wala siya mituman sa ilang “prescribed COC form”. Ang suwat nadawat niadtong Disyembre 27.
Bisan pa sa pagduso og Motion for Reconsideration niadtong Enero 3, 2025, ang iyang apela nasalikway, resulta sa wala pagkalakip niini gikan sa opisyal nga balota.
“Sa katapusan ang atong kaakuhan sa pagsalmot sa Eleksyon 2025 wala nay katumanan ug dili na kita makapaambit sa atoang politikanhong barug sa mga isyu sa katawhan hilabina sa hisgutanang Seguridad sa Pagkaon, Seguridad sa Trabaho’g panginabuhian ug Power na Serbisyo Sosyal,” pahayag niya.
Nagpadayag og pagmahay si Caballes sa iyang “disqualification” ug nagpasalamat sa iyang mga tagasuporta, nga nagpahimug-at sa iyang dedikasyon sa pag-alagad ug adboksiya sa mga isyu sama sa kasegurohan sa pagkaon, panarbaho, ug serbisyong sosyal.
Atol sa pagduso sa COC, gipadayag niya nga ang usa sa iyang mga damgo sa pagdagan alang sa pagka-mayor. Matud niya nga ang iyang pagdagan sa pagka-mayor di lang tungod sa iyang online content.
Samtang lima ka mga kandidato magtigi alang sa posisyon sa pagka-mayor sa dakbayan, base sa opisyal nga balota nga gi-post sa website sa Comelec.
Kini naglakip kang kanhi presidente Rodrigo Duterte, kinsa kanhi nagserbisyo isip mayor sa Davao City kapin 20 ka tuig una nidagan ug nidaug sa 2016 national election. Sukad niadto, wala pa siya mapildi sa pagdagan sa bisan unsang posisyon.
Apil nga nagtinguha sa posisyon mao si Karlo Alexei Nograles, anak sa kanhi kontra ni Duterte, ang kanhi house speaker Prospero “Boy” Nograles.
Si Karlo kanhi nagserbi isip Davao City First District Representative, nga kasamtangang gikuptan karon sa anak ni Duterte, incumbent Representative Paolo Duterte.
Nagserbi sab si Karlo ubos sa administrasyon ni Duterte isip Cabinet Secretary, samtang nangalagad sab siya isip Chairperson sa Civil Service Commission ubos ni President Ferdinand “Bongbong” Marcos Jr. una nikanaug aron nga modagan sa pagka-mayor sa Davao City.
Si religious leader Bishop Rod Cubos, nagmugna sa Christ the Healer International Missions Movement (CHIMM), nalakip sab sa listahan.
Ang kandidatura ni Cubos maoy iyang tubag sa panawagan sa iyang mga ginsakpan.
Laing mga kandidato sa pagka-mayor naglakip kang Jonathan Julaine ug Joselito Tan.
Alang sa pagka-mayor sa Davao City, mga kandidato naglakip kang incumbent Davao City Mayor Sebastian “Baste” Duterte, incumbent councilor Bernie Al-ag, Marcos Alcebar, ug Oyie Soriano-Barcena.
Nihatag og dalan si Baste alang sa kandidatura sa iyang amahan human nga nibalik ang naulahi sa iyang pagretiro sa politika. Samtang si Al-ag, kanhi suporter ni Duterte, maoy nihagit sa outgoing mayor, kinsa kanhi nagbutyag nga nibiya sa iyang administrasyon. (Ralph Lawrence G. Llemit)
