Ben Madilynn
Palawman ang imbestigasyon sa Mabolo Police Station sa pagkatagak sa usa ka real estate broker sa ika 34 ka andana sa usa ka condominium building nga nahimutang sa Cardinal Rosales Street, Barangay Mabolo, Dakbayan sa Sugbo, alas 5:30 sa hapon, Biyernes, Enero 10, 2025.
Ang biktima nailhan nga si Rosanna Lopez Reynes, 67, residente sa L. Tudtud Street, Barangay Mabolo, Dakbayan sa Sugbo.
Matod ni Police Major Romeo Caacoy Jr., hepe sa Mabolo Police Station nga base sa ilang inisyal nga imbestigasyon nga aksidente ang nahitabo sa dihang naligas ang tiil sa biktima nga gikan sa iyang gitungtongan.
Sigun sa pamahayag sa security guard sa building nga si Jovie Pagobo Inhog nga kalit lang sila nga nakadungog og lagubo ug sa ilang pagsusi usa ka babaye nga nagbuy-od na sa sementado nga kalsada, atubangan sa building nga wala nay kinabuhi ug dili na mahitsura ang panagway gumikan sa impact sa iyang pagkatagak.
Gibutyag ni Caacoy nga kanunay nga magbalikbalik ang biktima sa maong building kay adunay buyer sa usa ka condo unit.
Nananghid kini sa mga personnel sa maong building nga manghuwam og lamesa ug bangko alang sa iyang pa swerte kun Feng Shui.
Didto matod pa gibutang sa biktima ang lamesa ug bangko sa terrace ug gituohan nga mipatong kini kay adunay gikab-ot nga maoy hinungdan nga naligas ug natagak.
Nagduda usab ang kapulisan nga atol sa pagkusog sa hangin dungan sa pagbundak sa uwan nahitabo ang aksidente.
Apan bisan pa man niini mopalawom ang kapulisan sa ilang imbestigasyon kon wala bay foul play sa maong kamatayon.
Nakakuha nag CCTV camera ang mga imbestigador sa Mabolo apan matod ni Caacoy nga manguha pa sila og laing angle aron maklaro gyud nila ang tanan.
“Sa CCTV nga among nakuha siya paman ang akung nakita pero ako pa gyud gipakuha ang tanang mga CCTV, dili pa gyud nato ma-close ang possibility kung naa bay foul play,” matod ni Caacoy Jr.
Ang kabanay sa biktima nga dili lang magpahingan nagkanayon nga mobalik sila sa police station aron klarohon unsa gyud ang hinungdan nganong natagak ang biktima.
Dili sila motuo nga miambak o tinuyoan ang hitabo kay wala man kini problema nga usa ka dalaga ang maong real estate broker.
