Ben Madilynn
Trigger Warning: Mention of murder
Makalipas ang maraming taon ay nadakip na ng mga awtoridad si Lope Jimenez, isa sa mga akusado sa pagpaslang kay Ruby Rose Barrameda, kapatid ng aktres na si Rochelle Barrameda.
Matagal nang tinutugis ng batas si Jimenez, na gumamit ng mga alias na “Victor Vidal Duenas” at “James Paul Dwight.”
Dinakip si Jimenez ng mga tauhan ng Quezon City Police District — Criminal Investigation and Detection Unit (QCPD-CIDU) dahil siya ang itinuturong utak ng pagkidnap, pagnanakaw, at pagpatay sa isang negosyanteng nawala noong Enero 5, 2025.
Ang bangkay ng negosyante ay isinilid sa drum at ibinaon sa isang lugar sa San Jose Del Monte, Bulacan.
Kidnapping with homicide at carnapping ang mga kasong isinampa laban sa akusado.
Pero itinanggi ng akusado na siya si Jimenez na sangkot sa pagpatay kay Ruby Rose noong Marso 2007.
Photo/s: QCPD-CIDU
RUBY ROSE BARRAMEDA MURDER
Iniulat ang pagkawala ni Ruby Rose noong Marso 14, 2007.
Makaraan ang dalawang taon, noong Hunyo 2009, natagpuan ang kanyang bangkay na inilagay sa loob ng sementadong steel box na itinapon sa karagatan ng Navotas.
Naniniwala ang naulilang pamilya ni Ruby Rose na may kinalaman ang asawa nitong si Manuel Jimenez III sa pagkawala at pagpaslang sa kanya.
ROCHELLE BARRAMEDA IDENTIFIES LOPE JIMENEZ
Personal na nagpunta si Rochelle Barrameda sa tanggapan ng QCPD-CIDU kahapon, at kinilala niya si Jimenez bilang pumaslang sa kanyang kapatid.
Sa kanilang paghaharap, inusig ni Rochelle ang akusado.
Sabi ng aktres kay Jimenez, “Hindi mo kilala si Ruby Rose? Pero nandito ka na, masaya na ako na nandito ka na. Ang tagal mong nagtago.”
Tinanong si Rochelle kung nakasisiguro itong iisang tao lamang si James Paul Dwight at Lope Jimenez.
“Hindi ko siya makakalimutan,” may katiyakang sagot ng aktres.
Photo/s: Rochelle Barrameda Labarda Facebook
UNCLE OF RUBY ROSE’S HUSBAND
Sa eksklusibong panayam ng PEP.ph (Philippine Entertainment Portal) kay Rochelle nitong Biyernes ng gabi, Enero 10, ipinapapasakamay raw niya sa Diyos ang pagkakadakip kay Jimenez.
“Thank you, Lord!” sambit niya.
Isiniwalat ni Rochelle na Lope Jimenez ang totoong pangalan ni James Paul Dwight aka Victor Vidal Duenas.
“Siya ang uncle ng husband ni Ruby Rose,” pahayag ni Rochelle.
“Siya ang nagtago ng napakatagal at isa sa mga suspect sa karumal-dumal na pagpatay sa kapatid kong si Ruby Rose Barrameda, isinilid sa drum, sinemento at itinapon sa dagat ng Navotas nu’ng March 14, 2007.”
Mensahe pa ni Rochelle kay Jimenez: “Hindi ka puwedeng magtago habang buhay, kahit magpalit ka ng identity. Demonyo ka! Mamamatay tao!”
