Kapitan iti Irisan, suportado iti panagaramat iti Black Soldier Fly kadagiti nabubulok a basura
Ben Madilynn
Supsuportaran ni Irisan Barangay Captain Arthur Carlos ti panagaramat iti Blacksoldier Fly kadagiti nabubulok a basura a nangrugin a maipatungpal iti masakupanna a barangay.
Iti panakiuman ti Bombo Radyo kenkuana, mangnamnama daytoy nga ad-adda pay a mapaado dagiti nadakamat a klase iti insekto tapno adda ti maaramat dagiti amin a babbarangay iti Baguio City a mabalin a pakaiturungan dagiti nabubulok a basura dagiti residente.
Kinunana nga iti agdama ket ribu paylaeng dagiti black soldier fly larvae a maar-aramat tapno maimanihar ti sumagmamano a nabubulok a basura iti siudad.
Sigun kenni Kapitan Carlos, kabaelan dagiti black soldier fly larvae a kanen dagiti nabubulok iti las-ud laeng ti sumagmamano a minutos pakairamanan dagiti pimmusay a dingwen kas iti pato,aso,pusa, ken daduma pay.
Innayon ti kapitan a nasaysayaat nga iti pasilidad nga ayan dagiti black soldier fly larvae laingen ti pangiturungan kadagiti pimmusay a dingwen imbes nga ipaiyanod dagitoy kadagiti kankanal.
Mainaig iti dayta,kinuna ni Kapitan Carlos a masapolda pay ti kanayunan a panakitungtong iti indibidwal a nangisingasing iti nadakamat a proyekto tapno malawlawaganda nu anya a klase ti nabubulok a basura ti mabalin nga ipakan kadagiti black soldier fly larvae.
Kabayatanna, agtultuloy latta ti panagkiddaw ti kapitan kadagiti residente a mangipatungpalda iti composting kadagiti nabubulok a basurada nu addaan dagitoy iti nawaya a paraangan para iti compost pit tapno maliklikan ti panakaibeleng dagiti nabubulok a basura iti maymaysa a lugar.//Bombo Rob Dominguez
