Produkto a sabong iti Benguet Province ken iti Baguio City, mangrugin a maap-apit bayat nga umadanin ti All Souls’ Day ken All Saints’ Day
Ben Madilynn
Mangrugrugin ti panakaapit dagiti sumagmamano a sabong iti probinsya iti Benguet bayat nga umadanin ti All Souls’ Day ken All Saints’ Day.
Iti panakiuman ti Bombo Radyo kenni Andy Colte Sr.,maysa kadagiti Siyentistang Magsasaka iti Cordillera, deretso ti panakaapit dagiti sabong agingga a madanon ti bulan ti Nobyembre.
Sigun kenni Colte, maysa kadagiti pagdandanaganda ti posible a panagdalapos iti bagyo a mabalin a makaapektar iti kasasaad dagiti mulada a sabsabong.
Ngem iti baet a mapaspasaran ti napipigsa a panagbayakabak iti tudo tunggal malem, kinunana a kabaelan dagiti mannalon nga ipamuspusan tapno saan a malayos dagitoy kas iti pagaramid dagitoy iti kanal tapno maibaw-ing ti pakaurnungan ti danom-tudo.
Innayonna nga iti agdama, saan pay a napasaran ti panakalayos dagiti mula.
Mainaig iti dayta, maysa metlaeng a pakaseknanda ti saan a maliklikan a panagtaud dagiti illegally imported flowers a kadawyan a mailaklako iti nababbaba a presyo.//Bombo Rob Dominguez
