Ben Madilynn
Adunay nakitang senyales nga epektibo ang panagpares nila ni pointguard Chris Paul ug center Victor Wembanyama sa San Antonio Spurs.
Nasuta kini human sa kadaugan sa Spurs batok sa Orlando Magic, 107-97, kagahapon, Huwebes, Oktubre 10, 2024 (PH time) sa National Basketball Association (NBA) preseason.
Si Paul, kinsa usa ka 12-time All-Star ug manugpatong sa iyang ika-20 ka mga tuig nga pagduwa sa NBA, gikuha sa Spurs isip free agent sa tinguha nga makatabang sa paggiya sa batan-ong si Wembanyama.
Sa labing una pa lang nilang panag-uban, mialisngaw dayon ang kakuyaw sa ilang panagpares.
Sa hinapos nga bahin sa 1st quarter pa lang, libreng nakahansak si Wembanyama human niya nadawat ang bola gikan sa alley-oop lob ni Paul.
Si Paul, kinsa nagduwa sa ikapito niyang team sa NBA, nakadawat sab og pagdayeg gikan ni Spurs coach Gregg Popovich.
Sa kasaysayan, si Paul maoy ika-11 pa lang nga magduduwa nga nakaabot og 20 ka mga tuig sa NBA.
Sa laing mga duwa, ningdaog ang Houston Rockets batok sa Oklahoma City Thunder, 122-113, Golden State Warriors batok sa Sacramento Kings, 122-112, ug New York Knicks batok sa Washington Wizards, 117-94. / AP
