Sumagmamano a residente, kidkiddawenda ti dagus a panakapasayat ken panakaipasdek ti kanayonan a drainage canal idiay Puguis-Buyagan Rotonda, La Trinidad, Benguet
Ben Madilynn
BENGUET PROVINCE – Kidkiddawen ti sumagmamano a residente ti dagos a pannakapasayaat ken kanayonan a drainage canal idiay Puguis-Buyagan Rotonda, La Trinidad, Benguet.
Kasaruno ti napasaran a panaglayos idi kalman sadiay.
Iti interview ti Bombo Radyo kenni Miller Kilbas, residente ti Puguis-Buyagan Rotonda, saan laeng a daytoy ti umuna a gundaway a napasamak ti panaglayos isu’t gapuna a kidkiddawenda iti local government unit (LGU) ti pannakatarimaan ti kanayonan a kanal tapno saan a mapasamak manen ti panaglayos.
Naobserbaranda pay a maymaysa laeng ti kanal a naibangon wenno naaramid isu’t gapuna a mapaspasaran ti panaglayos apaman a napigsa ti panagbayakabak ti tudo.
Idi nadamag nu maysa pay ti basura kadagiti rason a naglayos iti nasao a lugar, kinuna dagiti dadduma a residente nga awan ti nakita a basura a naipullat nu diket kinakurang laeng ti drainage canal.
Maipalagip pay nga inaklon ni La Trinidad Mayor Romeo Salda a kinakurang iti drainage canal ti kangrunaan a rason ti napasamak a panaglayos iti nasao a lugar.
