Bangkay ti nabitay a Pilipino sadiay Saudi Arabia, saan a mabalin a maiyawid iti pagilian; siam pay a Pilipino sadiay naituding a mabitay
Ben Madilynn
SAUDI ARABIA- Kinompirmar ti Philippine Embassy sadiay Riyadh, Saudi Arabia a saan a mabalin a maiyawid ti bangkay iti nabitay a Pilipino gapu iti linteg ti nasao a lugar.
Maipalagip a nabitay ti nasao a Pilipino idi Oktubre a singko iti agdama a tawen gapu iti panangpapatayna iti maysa a Saudi national babaen iti panangkabilna iti ulo daytoy iti martilio.
Napasamak ti insidente kalpasan ti saanda a panagkinnaawatan maipapan iti negosio.
Sigun kenni Riyadh Charges d’ Affaires Rommel Romato, timmulong ti Saudi government a maitantan ti pannakabitay ti Pilipino tapno maipaayan iti naan-anay a gundaway a mangkiddaw iti pammakawan iti pamilia ti biktima ngem saanda a pinaburan.
Inlawlawag pay ni Sheikh Mahid Mangondaya, maysa nga indibidual a nagadal iti Islamic Law sadiay Saudi Arabia a ti Sharia’h Law a maaddaw iti Q’uran ket mata iti mata.
Kayatna a sawen a ti pannangipaay iti dusa ket katukad ti inarimid ti suspek iti biktima.
Mainaig iti dayta, kinuna ni Department of Foreign Affairs Undersecretary Eduardo de Vega a sigud a karaman ti nasao a Pilipino iti death row sadiay Saudi Arabia idi 2022 kalpasan nga inaramida ti krimen idi 2020.
Innayon pay ni de Vega nga immuna nga inaklon ti nabitay a Pilipino a pinadasna nga iyawid ti bangkay iti Saudi National iti pagilian ngem nakemmeg daytoy iti sangladan dagiti barko.
Immun-una metten a kinuna ni de Vega nga impaay ti gobierno ti amin a legal assistance ken inaramidda amin a remedyo, pakairamanan ti presidential letter of appeal ken dadduma pay.
Ngem saan daytoy nga umdas tapno mapaburan ti kiddawda a saan a matuloy ti pannakabitay daytoy.
Malaksid iti dayta, nagkedked met ti pamilia ti biktima nga umawat iti “blood money” wenno mangipaay dagitoy iti kuarta kas sukat ti pannakawaya-waya ti Pilipino, isu’t gapuna a naituloy ti pannakapapatay daytoy.
Kabayatanna, kinuna ti Philippine Embassy sadiay Riyadh a siam a Pilipino ti nakapila para iti death row, nu sadino maysa ditoy ti nangpapatay met iti Saudi National.
Ikagkagumaan met ti nasao nga imbahada nga aramiden dagiti amin a kaskenan nga addang tapno maliklikan ti pannakabitay dagitoy.
Nupay kasta, saan a gagangay nga ibaga ti gobierno ti Saudi no kaano a maipatungpal dagiti pannakapapatay ngem agtultuloy ti pannakikomunikar ti gobierno ti pagilian kadagiti otoridad sadiay.
Iti baet daytoy pagdandanagan ti nasao nga embahada no maipatungpal ti bitay iti agdama a tawen ken mabalin a mapapatay dagitoy iti aniaman nga oras.
