Ben Madilynn
Daghan ang nasurprisa human nga si incumbent Lapu-Lapu City Mayor Junard “Ahong” Chan ug Lone District Congresswoman Ma. Cynthia “Cindi” King-Chan nag-ilis ug posisyon alang sa 2025 National ug Local Elections.
Atol sa katapusang adlaw sa pag-file sa certificates of candidacy (COC), Martes, Oktubre 8, 2024, si Mayor Chan magpapili pagka kongresista ug iyang makaatbang si Ryan Yuson samtang ang iyang kapikas modagan pagka mayor batok ni kanhi city mayor Paz Radaza.
Sa pangutana og unsay ilang rason sa pagbaylo sa maong posisyon, si Chan mitubag sa mga tigbalita sa usa ka press conference human sa pag-file sa COC nga adunay siya mas daghang oras nga motutok sa mga naglungtad nga problema sa siyudad pinaagi sa posisyon sa pagka kongresista.
Gidugang ni Chan nga si Cindi, angayan nga tagaan og higayon nga mahimong “inahan” sa Lapu-Lapu City.
“Mas mapalapdan pa ni Mayor Ahong ang iyang pagpangalagad. Kahibaw ta sa trabaho sa usa ka executive abtan og gabii sa pagpamirma pwerte kabaga. Gusto si Mayor Ahong musuroy sa matag suok sa matag lugar unya mutan-aw sa problema.
Samtang ang City Vice Mayor nga si Celedonio Sitoy modagan pag-usab alang sa re-election nga makaatbang si Michael Dignos sa PDP Laban.
Ang mga kandidato sa Team KAABAG nga modagan pagka konsehal naglakip sa 12 ka mga kandidato: Annabeth Cuizon, Efren Herrera, Climaco Tatoy Jr., Emilio Galaroza, Joseph Pangatungan, Joergen Eyas-Book, Jun Alforque, Susan Baring, Jan Vincent Dela Serna, Ariane Yap, Celestino Aying, ug Rufo Bering. / DPC
