Ben Madilynn
Bugtong ang iya na lang ‘protected post belt’ ang nagpugong sa lineman nga dili mahulog gikan sa poste human kini nakuryentihan patay ug nagbitay sa electric post sa CEBECO.
Ang maong insidente nahitabo sa national highway sa Barangay Cawayan, lungsod sa Dalaguete, Sugbo niadtong alas 3:30 sa hapon, Martes, Oktubre 8, 2024.
Ang biktima giila nga si Eric Dupal-ag Capilitan, 26, minyo lineman sa CEBECO 1, taga Sitio Ilaya Brgy. Poblacion, lungsod sa Dalaguete.
Si Police Major Vincent Zozobrado, hepe sa Dalaguete Police Station nga nahinabi sa Superbalita Cebu miingon nga ang biktima nag-ayo sa linya sa kuryenti sa maong dapit apan aksidente nga nakahikap sa live wire hinungdan nga nakuryentihan.
Gitabang si Capilitan sa iyang mga kauban ug mga rescuers ug daling gidala sa Cardinal Rosales Hospital apan si Dr. Jaime Fabiola mideklarar sa biktima nga dead-on-arrival (DOA).
“Nakalitan ang mga kauban kay kalit ra man siyang mikirig nakasaghid og live wire,” matod ni Zozobrado. / DVG, GPL
