Quiboloy miduso og COC alang sa pagka senador

Detenido nga Kingdom of Jesus Christ (KOJC) leader nga si Pastor Apollo Quiboloy ni-file sa iyang certificate of candidacy (COC) sa pagka senador alang sa 2025 midterm polls niadtong Martes, Oktubre 8, 2024, ang katapusang adlaw sa filing.

Si Commission on Elections (Comelec) Chairman George Garcia niingon nga ang abogado ni Quiboloy nga si Mark Tolentino nisang-at sa COC sa nagpaila nga anak sa Diyos.

Kasamtangang gipriso si Quiboloy sa Camp Crame, Quezon City tungod sa kasong qualified human trafficking ug child and sexual abuse nga gisang-at sa pipila ka kanhi sakop sa KOJC.

Siya gidakop human sa 16 ka adlaw nga intensed manhunt sulod sa KOJC compound sa Davao City niadtong Septiyembre 8.

Ang giingong ilegal nga kalihokan nga gihimo sulod sa KOJC, partikular na ni Quiboloy ug sa iyang suod nga mga sumusunod, giimbestigar sa Senate Committee on Women, Children, Family Relations ug Gender Equality.

Daghang babaye nga giingong gi-sexually abused ni Quiboloy nipaambit sa ilang makalilisang nga kasinatian sa mga kamot sa mga lider sa sekta. Si Quiboloy nag-atubang usab og susamang kaso sa Estados Unidos. / TPM / SunStar Philippines