Asilo miabot na sa Japan alang sa lisod nga misyon

Niabot na sa Japan kagahapon, Oktubre 8, 2024, ang wala’y pildeng Filipino prospect nga si Gerwin Asilo alang sa usa ka dakong tahas sa umaabot nga pipila ka mga adlaw.

Si Asilo, kinsa sakop sa PMI Boxing Stable sa Sugbo, nakatakdang makig-away ni Japanese Tenshin Nasukawa alang sa inilugay sa bakanteng World Boxing Organization (WBO) Asia-Pacific bantamweight title karong Oktubre 14 sa Ariake Arena sa Tokyo.

Ang lumad nga taga Ubay, Bohol mosuway pagdugang og laing regional title ning labing una niyang away sa gawas sa Pilipinas.

Si Asilo, 23, maoy tag-iya sa WBO Oriental bantamweight belt nga iyang naangkon pinaagi sa 2nd round KO nga daog batok ni Thai Surat Eaim Ong niadtong Hulyo 27.

Gilaumang sagubangon ni Asilo ang labing lisod niyang away batok ni Nasukawa, kinsa usa ka kickboxing superstar sa Japan nga adunay limpyong kickboxing record nga 42-0.

Isip usa ka boksidor, si Nasukawa, 26, adunay rekord nga 4-0, 2KOs samtang si Asilo, 23, adunay 9-0, 4KOs nga baraha.

Ning tuiga, duha ka dagkong kadaugan ang narehistro ni Nasukawa diin pulos niya gipasundang sa 3rd round sila si Luis Robles ug Jonathan Rodriguez. / EKA