abyasa
Saanen pay a napalubusan a mangipila ti kandidatura ti maysa nga indibidual a kumamakam kuma a agipili ti Certificate of Candidacy gapu ta eksakto a nagrikep ti opisina ti Commission on Elections ditoy siudad ti Laoag iti oras ti ala-singko ti malem.
Iti pakabuklan, adda 18 a kandidato para iti posision a Sangguniang Panlungsod Member, dua a kandidato para Bise-Mayor, ken dua a kandidato para Mayor, idinto a dumanon iti 22 iti agpaidasig iti 2025 Midterm elections ditoy siudad.
Segun kenni Atty. Julius Balbas, Commission on Elections Officer ditoy siudad, adda iti opisial a listaan ti opisinada ti nagan dagiti opisial a nangipila iti Certificate of Candidacy (COC)-da.
Mainaig iti daytoy, ti bilang dagiti rehistrado a botante iti ditoy siudad ket umabot iti 79,687 ken manamnama nga umadu daytoy iti agarup 2,000.
Innayonna a maangay ti automated counting machine demonstration manipud iti bulan ti Nobiembre agingga Enero iti nagduduma a barangay tapno maipakita no kasano nga usaren dagiti voting machine.
Kabayatanna, namnamaen ni Balbas a suroten dagiti kandidato dagiti pagannurotan ti Commission on Elections, nangruna iti kampania a mangrugi inton Marso 2025.
