Ben Madilynn
Nakit-an ang sakyanan nga naka-hit-and-run sa dryaber sa habalhabal ug iyang pasahero nga parehong nangamatay sa Barangay Jagobiao, Dakbayan sa Mandaue niadtong kaadlawon sa Dominggo, Oktubre 6, 2024.
Ang sports utility vehicle nga Toyota Fortuner nakit-an sa kapulisan nga giabandonar sa usa ka dapit sa lungsod sa Consolacion ug kini naa na karon sa kustodiya sa Traffic Enforcement Unit sa Mandaue City Police Office (MCPO).
Ang mga biktima giila nga silang Richard Quia-ot ug Maria Niña Logarta Boyles, pulos managsilingan sa Barangay Labogon, Dakbayan sa Mandaue.
Matod pa, ang mga biktima sa Consolacion namalit sa merkado alang sa anibersarsyo sa ilang homeowners association.
Apan pag-abot sa Jagobiao, ilang nakasugat ang usa ka SUV nga ni-overtake sa laing sakyanan ug nibangga kanila nga niresulta sa ilang dihadiha nga kamatayon.
Inay nga mohunong ang drayber, nipasirit na hinuon kini sa pagpadagan nga gibiyaan ang duha ka mga biktima nga nagbuy-od sa karsada.
Matod ni Police Lieutenant Colonel Mercy Villaro, information officer sa MCPO nga nahinabi sa dyHP, nga ilang natultulan ang maong sakyanan human nga ilang nasubay ang mga CCTV camera nga gibilin kini sa usa ka bodega sa Consolacion.
“Dako ang pagpasalamat sa MCPO sa mga tawo nga ni-cooperate labi na sa mga establishments nga naay CCTV ug sa city government nga nakita gyud kung asa mipaingon ang kining sakyanan nga fortuner ang ni hit and run sa atung mga biktima,” matod ni Villaro.
Dili pa makabutyag si Villaro kung ang tag-iya sa bodega diin didto gi-abandone ang maong sakyanan mao ba usab ang tag-iya sanglit nagpadayon pa ang ilang imbestigasyon.
Nailhan na usab nila kung kinsa ang tag-iya sa maong sakyanan base sa record niini sa Land Transportation Office (LTO) 7 apan nagdumili lang una kini sa paghatag sa kasayuran sa publiko kung kinsa kini.
Lakip sa ilang subayon kung ang nag maneho niini mao ra ba usab ang tag-iya sa sakyanan nga nakabangga.
Sa migawas sa imbestigasyon sa kapulisan, matod ni Villaro, nga ni-overtake ang SUV ug ni-counterflow kini sa laing lane diin didto niya na bangga ang mga biktima.
Ang anak ni Maria Niña Logarta Boyles nga si Erajane Boyles mitug-an sa interview sa DyHP nga nanawag nila ang abogado sa tag-iya sa SUV nga nakabangga sa iyang inahan ug nipahibawo nga andam sila nga moabaga sa tanang gasto sa mga biktima. / AYB
