Ben Madilynn
Sa gipatawag nga press conference niadtong Sabado, Oktubre 5, 2024 sa Grand Menseng Hotel, Davao City gipahibawo nga adunay Duterte-Duterte tandem sa 2025 elections sa maong dakbayan.
“O sige, tatakbo na lang ako, yan ang gusto nyo eh,” matod pa ni kanhi Presidente Rodrigo ‘Digong’ Duterte nga magpapili pagka mayor sa Davao City. Tandem ni Duterte ang iyang anak nga si Sebatian ‘Baste’ Duterte nga magsilbi’ng vice mayor.
Iyang giklaro nga maglisod siya sa pagdagan alang sa national position ilabi na sa iyang pangedaron ug lisod na alang kaniya nga mangampaniya.
“Magko-collapse lang ako niyan,” sumala pa niya.
Atol sa maong kalihukan, gibalikbalik og sulti ni Duterte nga 73 anyos na siya karon, apan kon basehan ang online sites nga available sa Google search nagpakita nga natawo siya niadtong Marso 28, 1945, nga nagpasabot nga 79 anyos na siya. / CEA / SunStar Davao
