190 a kilo ti basura, naukkon iti naisayangkat a coastal clean-up iti Brgy. Caruan iti ili ti Pasuquin
abyasa
LAOAG CITY – Naladingitan ni Mr. Joegie Jimenez, Pollution Control Officer ti Provincial Government of Ilocos Norte iti kaadu dagiti naukkonda a basura iti naisayangkat a Coastal Clean-Up iti paset ti Brgy. Caruan iti ili a Pasuquin.
Segun kenkuana, umab-abot iti 190 a kilo dagiti naukkonda a basura a pakairamanan ti plastic bottle, styrofoam, plastic sachet, lata ken dadduma pay a basura.
Imbatadna a kinasaritana a dagus dagiti barangay officials ngem inlawlawag dagitoy nga adu laeng ti basura a maala iti igid ti baybay no kalkalpas ti bagyo ken awan met unay ti basura kabayatan ti panawen ti kalgaw.
Kunana a mamati dagiti nadakamat nga opisial ti Brgy. Caruan a dagiti basura a naukkonda iti igid ti baybay ket naggapo iti sabali a lugar.
Mainaig iti daytoy, inlawlawag ni Jimenez nga iti panangipaayna ti mensahe ket inpakaammona a mangisayangkat ti Environment and Natural Resources Office ti Information Education Campaign mainaig iti “solid waste management” iti Brgy. Caruan ken nasken nga atendaran daytoy dagiti barangay officials ken dagiti bumaranggay.
Kabayatanna, inpakaammona a kinabinnulig ti Environment and Natural Resources Office a mangisayangkat iti a programa ket dagiti nagduduma nga ahensya ti gobierno nangruna ti Department of Environment and Natural Resources Office (DENR) ken dagiti private sectors.
