Ben Madilynn
Natay ti maysa a chief of police ti Cogon Police Station idiay Cagayan de Oro kalpasan a napaltugan iti ulo babaen ti riding in tandem suspect.
Napasamak ti pammaltog iti sangwanan ti maysa a kamposanto wenno Memorial Park idiay Brgy Bulua, siyudad ti Cagayan de Oro idi rabii ti Sabado, Oktubre 5 bayat nga agawiden ti biktima manipud iti trabaho.
Nabigbig iti biktima a ni Police Capt. Abulcahar Armama, agdama a Cogon Station 2 commander, addaan asawa ken annak.
Segun kenni Police Regional Office 10 Director Brig Gen Jaysen de Guzman, naiturong ti nasao a police officer iti Polymedic Plaza, idiay Brgy Kauswagan, Cagayan de Oro City, ngem saanen a naisalbar dagiti doktor ti biag ni Armama.
Nangbukel ti Cagayan de Oro City Police Office iti task force, a mangsapol kadagiti dua a saan pay a nabigbig a suspek.
Nagpanawagan pay ni de Guzman iti publiko nga addaan ti ammo iti napasamak a krimen a makitinnulong iti pulisiya, babaen iti pannaki-koordinar kadakuada tapno mabigbig ken matunton iti paglem-lemmengan ita dagiti suspek.
Ni Armama ket kabilang iti Philippine National Police Academy Masidlak Class of 2017.
Awan pay ti na-establisar a motibo iti insidente, ngem maysa isuna nga aktibo a police officer nu maipapan iti kampanya ti illegal a droga, partikular iti masakopanna a lugar .
Kinapudno na, sumagmmano a drug syndicates ti nakaswan iti sidong ti panangimaton na iti Cogon Police Station.
Kabayatanna, naiyawiden ti bangkay tni Armama iti hometown na idiay Lanao del Norte.
