PNP chief Gen. Rommel Marbil, binilinna dagiti amin a police units iti intero a pagilian a paigetanda ti seguridad ti campaign period para iti 2025 midterm elections
abyasa
LAOAG CITY – Binilin ni Philippine National Police (PNP) chief Gen. Rommel Marbil dagiti amin a police units iti intero a pagilian a paigetan da ti seguridad, partikular kadagiti armado a grupo a mabalin a mangriribuk iti umay a campaign period para iti 2025 midterm elections.
Inaramid ti hepe ti nailyan a pulisya ti direktiba kagiddan ti agtultuloy a panagipila ti Certificate of Candidacy (COC) nga agngudo inton bigat, Oktubre 8.
Iti maysa a statement, kinunana a kritikal ti akemda a mangipasigurado iti natalged ken patas nga aglawlaw para kadagiti amin a kandidato kasta met iti publiko.
Segun ken ni Marbil, nakatutok ti puersa ti polisia kadagiti lugar nga addaan iti pakasaritaan ti kinaranggas mainaig iti eleksion babaen ti panangpa-iget ken panangipasdekda kadagiti checkpoint, ken agtultuloy a panangmonitor iti lugar.
Maipalagip nga immunan a nangipaulog ni Marbil ti pakdaar kadagiti amin nga opisial ti polisia a taginayunen ti neutralidad ken saan a makipaset kadagiti napolitikaan nga aktibidad.
