Beermen, simrek iti semis; First game iti PBA semifinals inton Miyerkoles, iti baetan ti Beermen ken Ginebra
Ben Madilynn
LA UNION – Simrek iti semifinals ti 2024 PBA Governors’ Cup iti San Miguel Beermen kalpasan a nangabak da kontra Converge FiberXers, iti iskor a 109-105.
Ni Eight-time Most Valuable Player June Mar Fajardo ti nangi-pangabak iti do-or-die game 5 da iti Converge kalpasan a naka-aramid ti 40 points, 24 rebounds, uppat nga assists ken maysa nga steal iti ay-ayam a naisayangkat idiay Ynares Center idiay Antipolo.
Nagnayon met ti 23 points ken 10 rebounds ni import EJ Anosike bayat a naka-10 points, siyam nga assists ken innem a rebounds ni CJ Perez.
Segun kenni Beermen coach Jorge Gallent, pudno kunana a pangnamnamaan ni Fajardo nangruna nu maipapan ti do-or-die game.
Kabayatanna, mangrugi ti best-of-seven semifinals inton Miyerkoles, Oktubre 9, 2024 idiay PhilSport Arena.
Umuna nga agsango iti semifinal round iti Beermen ken Barangay Ginebra iti oras ti alas 5:00 ti malem, kalpasanna, iti baetan ti Rain or Shine ken TNT KATropa iti oras alas 7:30 ti rabii.
