Ben Madilynn
Atol sa pagbunok sa uwan uban sa pagpanugdog ug kilat niadtong Sabado, Oktubre 5, 2024, duha ka mga lalaki ang naigo sa kilat sa managlahing sitio sa Brgy. Pulangbato, dakbayan sa Sugbo.
Usa ka 17 anyos nga naila sa pangan lang nga “Ghian’ nga taga Sityo Aroma sa Pulangbato ug usa ka 24 anyos nga si Jin Borbon, ulitawo, ug taga Sityo Cambaog sa samang barangay, nakaangkon og paso ug naangol.
Ang duha pulos nalandig sa ospital sa dakbayan sa Barangay Guba apan wa usab magdugay nakagawas usab dayon human luwas ang kahimtang human wala maintimano sa pagkaigo sa kilat.
Samtang, misuyla o niagas ang tubig sa kasapaan tungod sa kakusog sa uwan labi na sa Sityo Lower Tanay, Brgy. Pit-os, siyudad sa Sugbo diin 22 ka mga balay ang naapektohan nga gilangkoban sa 25 ka ma pamilya.
Sigon ni Department of Social Welfare and Services (DSWS) officer-in-charge Portia Basmayor nga gibalhin nila sa eskuwelahan ang mga gipangbakwit sa barangay gym tungod sa baha.
Samtang sa siyudad sa Mandaue, ang Maguikay Fire & Rescue Team ang nihimo og rescue operation pipila ka mga lumolupyo sa Sityo Tambis sa Brgy. Umapad dihang nisuyla ang tubig baha gikan sa sapa nga niabot na og taga liog sa barog sa tawo.
Dili mominos 317 ka pamilya ang gipanglalin sa covered court sa barangay apan nakauli na usab sa ilang tagsa dihang nihubas na ang baha. / DVG
