abyasa
LAOAG CITY – Posible a makaisalakan ti 1.2 milyon a biag ti panangipawil iti panaglako ti tabako kadagiti indibidual a naipasngay iti nagbaetan ti 2006 ken 2010 nangruna manipud iti lung cancer, maibasar iti panagsukisok.
Ti panagsigarilio ti responsable iti 85% kadagiti amin a kaso ti lung cancer a deadliest cancer iti intero a lubong basar iti World Health Organization.
No agtultuloy ti agdama a trend, maaddaan ti tallo a milyon a lung cancer deaths kadagiti agtutubo a naipasngay manipud iti 2006 agingga 2010 basar iti panagadal ti International Agency for Research on Cancer (IARC) ti World Health Organization.
Nupay kasta, no maipawil ti panaglako ti tabako kadagiti 650 a milyon a tattao, adda ti 1.2 milyon a pannakatay ti maliklikan inton 2095.
Gagem ti panagsukisok a tingitingen ti epekto ti tobacco-free generation manipud kadagiti kaso ti cancer ken dagiti pimmusay gapu iti daytoy manipud kadagiti 185 a pagilian.
Naammoan a nasurok 45% ti matmatay iti lung cancer kadagiti lallaki idinto a 31% met kadagiti babbai.
