Kamara, nangbukel ti ‘joint panel’ a mangtutok iti smuggling, hoarding, price manipulation – Speaker Romualdez
Ben Madilynn
LA UNION – Nangbukel ti House of Representatives ti joint panel a buklen ti lima a komite tapo tutukan iti pananglaban dagiti ahensya ti gobyerno iti smuggling, hoarding, price manipulation, ken dadduma pay nga aramid a manglap-lapped iti nawaya a panag-negosyo.
Segun kenni House Speaker Martin Romualdez, kangrunaan a ranta daytoy a linteg a pagbalinen a nalaka ti presyo ti taraon ken maital-o ti biag dagiti mannalon.
Maawagan a “Quint Committee” ti nasao a joint panel a kangrunaan a House Committee on Ways and Means nga idaulwan ni Albay Rep. Joey Salceda.
Impaganetget pay ni Speaker Romualdez a bantayan ti joint panel iti panangipatungpal ti baro a napirmaan a Republic Act (RA) No. 12022 wenno Anti-Agricultural Economic Sabotage Act.
Idi napan a lawas, pinirmaan ni President Ferdinand Marcos ti nasao a linteg idiay Palasyo ti Malakanyang ken inimatangan dagiti senador, kongresista ken opisyal ti gobyerno.
Kabayatanna, segun kenni President Marcos, maibilang nga “economic sabotage” iti smuggling, hoarding, profiteering, ken cartel operations, ken mapatawan ti nadagsen a multa ken tungpal biag a pannakaibalud, iti siasinuman a mapaneknekan a karaman iti ilegal nga aramid.
Iti sidong ti linteg, mabuangay ti maysa a konseho ken enforcement group a mangparmek ti smuggling operations ken tiliwen dagiti aglabsing iti nasao a linteg.
