2 ka suspek nga ‘mipatay’ sa 17 anyos nadakpan

Duha sa tulo ka mga responsable sa pagpusil-patay sa 17 anyos sa Sitio Exoville, Barangay Basak Pardo niadtong Huwebes, Hunyo 5, 2025, ang nadakpan sa gilusad nga follow up operation sa Inayawan Police Station alas 8:00 sa buntag, Dominggo, Hunyo 8, 2025, sa Barangay Kinasang-an, Siyudad sa Sugbo.

Unang nadakpan si Richard Olango Dalman human nga dunay nakahatag og impormasyon ug pagkaalas 12:05 sa hapon ug nadakpan sab ang kauban niini nga si Rhomel bellita alyas Tukmol.

Ang pabiling gawasnon mao ang kauban nga si Anecito Caballero Ebrado alyas Jr., nga hangtod karon nagtagutago.

Niadtong alas 6:20 sa gabii, Huwebes, Hunyo 5, 2025, napusilan-patay ang 17 anyos nga si Jesriel Rosende Oltiano sa Exoville, Barangay Basak Pardo.

Base sa nigawas sa imbestigasyon, ang target sa tulo ka mga suspek mao si Emerilio Nioe Gemarino alyas Ating, 43, nga nagpuyo ra sab sa maong dapit.

Si alyas Ating usa ka drug personality nga nadakpan na niadtong Hunyo 5, 2025, kinsa nabalhog  sa Inayawan Police Station.

Nakuha kang Ating ang usa ka pugakhang nga dunay tulo bala sa 12 gauge shotgun.

Ang pagkasikop ni Ating maoy naghatag og yawe aron mailhan kinsa ang nisuway sa pagpatay niya nga niangin na hinuon sa 17 anyos nga lalaki.

Positibo siya nga ang tulo maoy nagpusil sanglit sa miaging buwan gipusil sab siya nga ang bala nitapsing lang sa iyang bukton.

Human makuha ang tanang kasayuran, nilusad og hot pursuit operation ang kapulisan sa posibleng gipangtaguan sa mga suspek.

Sa impormasyon nga nakuha sa Superbalita Cebu sa intelligence sa Cebu City Police Office (CCPO), ang tulo pulos mga drug personality ug naa sa listahan sa PNP nga mga high value target ug sakop sila sa Nadera drug group ug Nadera gun-for-hire group.

Gimando ni Police Colonel Enrico Figueroa, ang hepe sa CCPO, nga pangitaon ang kauban nga pabilin nga gawasnon nga si Ebrado kinsa gituohan nga naa ra nagtagutago sa Kinasang-an, Pardo.

Giandam na ang kasong Homicide nga ipasaka sa kapulisan batok sa mga suspek. /AYB / GPL