Nagtugway sa kabaw duol sa sapa, nalumos

Mag-uuma nga nagtugway sa iyang binuhi nga kabaw nga gikatahong nilabang sa sapa ang nalumos-patay.

Ang insidente nahitabo niadtong alas 10:30 sa buntag Sabado, Hunyo 7, 2025 sa Purok Bugnay, Barangay Alpaco, Dakbayan sa Naga.

Ang namatay giila nga si Dionisio Bonghanoy Lapitan, 75, mag-uuma mga taga Purok 6 Kapuring, Brgy. Patag, Naga.

Ang kabanay ni Lapitan maoy unang nakadiskubre sa iyang gidangatan.

Basi sa imbestigasyon ni Police Master Sgt. Aristeo Tampus, imbestigador sa Naga City Police Station, si Marites Caburnay Labitad, 36, umagad sa biktima ang mibutyag nga napalgan niya nga nalumos si Lapitan nga nitidlom sa sapa nga nadala sa kusog nga sug resulta sa pagbunok sa uwan.

Gikataho nga bisan nga nag-uwan gipasibsib ni Lapitan ang iyang binuhi sa sagbot nga daplin sa sapa ug nilabang kini paingon unta sa atbang apan nadala sa kakusog sa sug sa tubig.

Gidala sa Naga Infirmary ang biktima apan gideklarar nga patay na.

Samtang ang kapulisan nitambag sa kabanay nga ipaubos sa autopsy ang lawas sa namatay aron sa pagtino nga way nahitabo foul play sa maong hitabo.

Atol niining pagsuwat, wa pa masayri kon misanong ang kabanay sa maong sugyot sa polis. / GPL