Andrew E reveals plans for Hollywood movie

Nagbakasyon si Andrew E sa Japan noong nakaraang Hulyo kasama ang kanyang pamilya para ipagdiwang ang kanyang ika-57 kaarawan.

Treat na rin niya iyon sa graduation ng kanyang mga anak.

“Ang hindi alam ng tao, kalahati lang iyon, vacation. Ang kalahati nun is business venture,” pagtatapat ni Andrew sa mediacon kamakailan sa Okada Manila.

“Why? Kasi, meron akong niluluto na Hollywood movie. So yung Hollywood movie needed funding and sponsorship.

“Ang sponsorship ko is 70% Japan-based yung shooting, 30% Philippines.

“So sa 70%, siyempre Japanese ang lalapitan mo, hindi Pilipino, di ba? So 70%, yung mga kakilala kong mga Japanese shachou, yun ang nilalapitan ko for coffee talk.

“And then, ‘O, shachou, ganito, may eksena kami na ganito, and a little bit like that, saan ka ba gustong pumuwesto?’

“So, isa sa mga nilapitan ko would be Toyota, yung company. Kasi meron kaming gagamiting vehicle na Toyota na ilalabas dun sa movie.”

Kasama ni Andrew sa pakikipag-usap sa Japanese shachou (boss, president ng company) ang Japanese line producer ng gagawing pelikula.

“Kasi kung hindi Japanese ang line producer, hindi uusap sa akin yung shachou,” sabi ni Andrew E.

“So it has to be Japanese yung uusap, yung nag-i-invite through me. So kailangan ko ito, that’s why I had coffee with him, together with the Japanese ano.”

ANDREW SHARES TIMELINE FOR START OF MOVIE’S SHOOT

Malamang na matapos muna ang halalan next year bago isu-shoot ang nasabing pelikula ni Andrew E.

“Kasi siyempre, hindi mo naman maga-guarantee na during election time, makakagawa ka ng ganun,” sambit ng veteran actor-rapper.

“Ewan ko, kung alam nyo yung tinatawag na oro-plata-mata (gold-silver-death). So, yun pa rin yun, susundin mo pa rin yun.

“Iyun daw ang patakaran ng paggawa ng movie — you cannot start with a plata or mata, and you can only start with oro para sureball.”

Ang mga buwan na “oro” ay Enero, Abril, Hulyo, at Oktubre.

Iniiwasan din ang pag-uumpisa ng shooting o negosyo kung Ghost Month, na madalas sumakop sa Agosto.

Dagdag ni Andrew E, “Kasi yung ibang mga production, nagtatanong din. Parang, ‘Sir, kailan tayo mag-start?’ Pag sinabing sa ganito, ‘Ahh…’ Ayaw din nila, ayaw din nila.”

ANDREW’S MOVIE CO-STAR IS A J-POP ARTIST

Ang co-star ni Andrew E sa nasabing movie ay ang 24-anyos na si Taki Saito na member ng J-pop group na FAKY (na katumbas daw ng Blackpink).

“Nag-usap na kami… she’s a Filipino, Brazilian, French, Japanese. And right now, she’s the model of Marc Jacobs,” lahad ni Andrew E.

“Personally, you know nag-ano kami, facetime. Usap-usap and then I want her to give me the preference kung ano yung requirement ng kanyang company which is Avex.

“Avex is one of the biggest in Japan, second to Sony. So Avex group is the one handling her.

“So siyempre pag gagamitin mo siya, papaalam ka sa Avex, you know. Kailangan may permission ka, ganun.

“So sabi niya, ‘Can I send you the 10 requirements?’ Nung sinend niya sa akin, andadali naman pala ng requirement.

“Kailangan daw, ang itsura, huwag masyadong guwapo. Ha! Ha! Ha! Ha! Ha! Akala ko, mahirap yung requirement. E, madadali lang pala!

“Sabi ko, ‘Sige, call ko yan, no problem.’ Ang pinaka for me mahirap lang, among ten, is yung sinabi niya na…

“Sa Japan pala, may tinatawag na entertainment culture na you need to provide a certain percentage ng money, allocated for the movie, para i-promote din ang Avex.

“Ganun pala yun. So kunwari, hihiramin mo yung ano nila, siya yung artist. Hihiramin mo yung artist ng Avex.

“So you’ll put a certain amount of budget para yung Avex mag-promote din ng movie mo, at under Avex. So very good yun, sabi ko, ‘Wow!’

“You know, yung movie mo na poster, makikita mo rin sa mga train, sa mga train station. So sabi ko, ‘OK pala yun. OK yun.’ So yun lang ang mahirap.”

Kaya nagkakilala sina Andrew at Taki ay dahil sa writer niyang Pilipino, na kaibigan ni Taki.

Ang nasabing writer ay katuwang din ni Andrew sa kumpanya niyang BroadLive USA.

Napakabait daw ni Taki. Nakakaintindi pa rin daw ito ng Tagalog.

“Pero siyempre, naiwan na niya yung Pilipinas for quite sometime. So I don’t think na ganun siya ka-fluent,” saad ni Andrew E.

“Pero mas fluent siya ng French saka Japanese. Kasi, dun siya lumaki.”

ANDREW SHARES LOW POINT IN SHOWBIZ CAREER

Bakit malapit sa puso ni Andrew E ang Japan?

Napangiti nang matamis si Andrew, “E, sagot sa kahirapan! Naipaliwanag ko na before, Japan embraced me when I was very low in my career.

“1997 nung sumadsad yung Filipino movie industry, saka movie industry. In fact, there’s no company signing you.

“In fact, all the movie outfits closed at that time, nung era na pumasok na ang pirated movies, pirated CDs.

“From 1997, nobody signed me. No company signed me. Viva did not sign me.

“At that time, 1997, merong patakaran ang Viva and may I share to you, meron silang corporate patakaran, ang sina-sign lang nila ay mga babae. ‘Mga lalaki, hindi namin isa-sign.’

“So, isa ako dun sa mga veteran artist na lalaki, male, na hindi na-sign. Pero tatanungin mo, ‘Bakit may mga young ones?’ Yes, young ones, oo. Pero I’m taking about veterans.

“So kung ifi-figure out mo, ire-reverse mo ang time, hindi ba’t kasama dun si Robin Padilla? Hindi rin siya na-sign. Yung mga panahong yun. Kami yun.

“Kami yun, hindi na-sign. Dennis Padilla, that era. Corporate move.”

ANDREW SHARES HOW HE FOUND GREENER PASTURES IN JAPAN DURING THE LATE ’90S

Ang pagbagsak ng career ni Andrew E sa Pilipinas noong 1997 ang nagbunsod upang mag-Japan siya.

“I looked for a greener pasture and it happened na at the time, yung Japan ang medyo talagang asensado and all that that,” pagmamatwid ni Andrew.

“May nagsabi sa akin, ‘Drew, come over here to Japan, you know, ayusin mo ang visa and all that, whatever. And then pag nakarating ka na rito, sagutin kita.’

Everyday ang pagsho-show niya noon sa Tokyo.

“Three shows everyday. Puro madaling araw. Would you believe, ang first show ko, 2:00 o’clock in the morning,” pagbabalik-tanaw ni Andrew E.

“Second show ko, 5:00 o’clock in the morning. Third show ko, 7:00 in the morning. Ang 7:00 in the morning, yun yung wall-to-wall jackpot.

“Andaming tao. Everyday! Yung audience, galing sa mga club. Yung mga customer na bibili ng tiket mo, puro galing sa trabaho nila sa club.

“Nagtatawagan sila. May cellphone na at the time sa Japan, di ba? ‘O, punta ka dito, kasi may show si Andrew E sa club namin.’

“So maghahatak ngayon yung japayuki. Maghahatak ng mga lima, sampu, whatever. Then after their work, they’ll to the club where I perform.”

Tatlong taon na rumatsada sa Japan si Andrew E, from 1997 to 2000. Doon niya nabuo ang kantang Banyo Queen.

Siyempre pa, kakantahin ni Andrew E ang Banyo Queen sa first ever major concert niya entitled 1 For Your Mind na gaganapin sa Disyembre 11, 2024 sa New Frontier Theater ng Cubao, Quezon City.

Ang nasabing palabas ay produced ni Jonathan Wee ng Ticket1 Concerts. Available ang tiket sa TicketNet outlets at Ticket1 branches nationwide.