Pagpa-umento sa parking fees sa Cebu City gisaway

Nitumaw ang daghang lantugi sa sugyot nga patas-an ang bayranan sa on-street parking sa Siyudad sa Sugbo.

Daghang residente nga nagkuwestiyon sa kaepektibo sa maong lakang sa pagsulbad sa nagpadayon nga problema sa trapiko sa siyudad.

Hinuon daghan sab ang nisugyot og lain-laing alternatibong solusyon — gikan sa mas hugot nga pagpatuman sa kasamtangang traffic rules ngadto sa dakong kalambuan sa inprastraktura alang sa mass transportation ug road widening initiatives sa mga comment nga gi-post online human sa report sa SunStar Cebu niadtong Biyernes, Hunyo 6, 2025.

Usa ka proposed ordinance, nga gisugyot ni Konsehal Jocelyn Pesquera, nagtinguha sa pag-amendar sa 1972 Cebu City Traffic Code.

Ang mga kausaban sa importanteng probisyon naglakip sa pagpalugway sa on-street parking hours, pagdili sa parking sa major roads sama sa Natalio Bacalso Avenue ug M.J. Cuenco Avenue, ug pagpahugot sa mga lagda palibot sa City Hall.

Gisugyot sa mga stakeholder ang pagpataas sa bayranan sa street parking aron maminusan ang kahuot sa trapiko, mapugngan ang mga motorista sa pagparking sa karsada, ug mapadako ang kita sa siyudad.

Apan ang mga netizen nagpakita og pagduha-duha, nahadlok nga kini makahatag og kabug-at sa mga sumasakay nga dili masulbad ang problema sa trapiko.

Mga comment sa online

Daghang netizen ang nangatarungan nga ang pagpataas sa bayranan sa parking dili makasulbad sa kahuot ug mahimong makapabug-at sa ordinaryong mga lungsoranon ug makapugong sa pagnegusyo.

“Patas-an ang parking rates unya walay dakop sa mga mag-hazard lights kay dili gusto mobayad sa parking fee,” matod ni Stephen Cui Canares sa usa ka komento.

“Higher parking rates are not the solution. (Only) the rich can afford higher rates,” matod sa laing komento gikan ni Philip Earl Barcenilla Lumantas.

Matod sa pipila ka netizen, ang nagpa-usbaw sa bayranan sa parking tinguha lang sa kita alang sa gobiyerno imbes usa ka tinuod nga solusyon sa trapiko.

Matod nila, ang dugang bayranan mahimo usab nga makaapektar sa mga indibidwal nga ubos ang kita ug posibleng mosangpot sa kurapsyon.

Gisugyot sa mga netizen ang pag-convert sa bakanteng mga luna sa downtown ngadto sa multi-level parking facilities, ilabi na duol sa mga tourist attraction sama sa Basilica Minore del Sto. Niño de Cebu ug sa downtown area. / EHP